ខេត្តកំពង់ឆ្នាំង:ករណីពុលស្រាសនិងស្រាថ្នាំបានកើតឡើងនៅខេត្តកំពង់ឆ្នាំងបានបណ្ដាលឱ្យប្រជាពលរដ្ឋចំនួន៤នាក់បានស្លាប់និងជាង៦០នាក់បានបញ្ជូនទៅសង្គ្រោះនៅមន្ទីរពេទ្យពេទ្យបង្អែកខេត្ត។សមត្ថកិច្ចបានឃាត់ខ្លួនអ្នកលក់ស្រាស,ស្រាថ្នាំចំនួន៣នាក់មកសាកសួរនៅអធិការនគបាលស្រុកទឹកផុសជុំវិញការពុលស្រានេះ។
លោកសូត្រសង់អភិបាលស្រុកទឹកផុសបានឱ្យដឹងកាលពីយប់ថ្ងៃទី២៨វិច្ឆិកា២០២០ថាហេតុការណ៍នេះបានកើតឡើងនៅម៉ោងប្រមាណជាង២រសៀលថ្ងៃទី២៨វិច្ឆិការ២០២០គ្រាដែលអ្នកភូមិមានការជ្រួលច្របល់។សមត្ថកិច្ចនិងអាជ្ញាធមូលដ្ឋានចុះទៅដល់ស្រាវជ្រាវជុំវិញបញ្ហានេះភ្លាមៗ។
លោកវេជ្ជបណ្ឌិតប្រាក់វ៉ុនប្រធានមន្ទីរសុខាភិបាលខេត្តកំពង់ឆ្នាំងបានឱ្យដឹងថាប្រជាពលរដ្ឋ៤នាក់បានស្លាប់។ក្នុងនោះស្លាប់នៅតាមផ្លូវចំនួន២នាក់នៅពេលបញ្ជូនទៅសង្គ្រោះនៅភ្នំពេញនិង២នាក់ទៀតបានស្លាប់នៅឯមូលដ្ឋាន ។
ប្រធានមន្ទីរសុខាភិបាលបានបន្តថាពេលនេះជនរងគ្រោះពុលស្រាស,ស្រាថ្នាំត្រូវបានដឹកមកសង្គ្រោះបន្ទាន់នៅមន្ទីរពេទ្យបង្អែកគ្រាដែលអភិបាលខេត្តកំពង់ឆ្នាំងលោកឈួរច័ន្ទឌឿននិងរដ្ឋលេខាធិការក្រសួងសុខាភិបាលក៏មានវត្តមាននៅក្នុងមន្ទីរពេទ្យបង្អែកខេត្តកំពង់ឆ្នាំងនេះដើម្បីតាមដានការវិវត្តន៍នៃជនរងគ្រោះដោយសារការពុលស្រាសនេះ។
លោកវេជ្ជបណ្ឌិតប្រាក់វ៉ុនបញ្ជាក់ថា ប្រជាពលរដ្ឋដែលរងគ្រោះសរុបចំនួន ៦៣នាក់ បានពុលស្រាស និងបានបញ្ជូនទៅមន្ទីរពេទ្យខេត្ត៥៧នាក់។ក្នុងនោះធ្ងន់៦នាក់ ហើយត្រូវបញ្ជូនទៅមន្ទីរពេទ្យក្រុងភ្នំពេញ ៤នាក់ និងស្លាប់នៅតាមផ្លូវ២នាក់ និងនៅឯមូលដ្ឋានស្លាប់ ២នាកទៀត។
សេចក្តីរាយការណ៍ពីមន្ទីរទេព្យស្រុកទឹកផុសបានឱ្យដឹងថា ជនដែលរងគ្រោះនៅក្នុងភូមិដំរិបឃុំអភិវឌ្ឍន៍ ស្រុកទឹកផុស មានចំនួន ៣នាក់ និងនៅភូមិខាងក្រោយវត្ត ក្នុងឃុំខ្លុងពពក ស្រុកទឹកផុសចំនួន ៦១នាក់បានបញ្ជូនទៅដល់មន្ទីរពេទ្យបង្អែកខេត្តកំពង់ឆ្នាំងអស់ហើយ។ឥឡូវនេះកំពង់ស្ថិតក្នុងការតាមដានព្យាបាលយ៉ាងយកចិត្តទុកដាក់ពីក្រុមគ្រូពេទ្យបង្អែកខេត្តកំពង់ឆ្នាំង។
សូមបញ្ជាក់ថានៅយប់ថ្ងៃទី២៨ខែវិច្ឆិកា២០២០នេះដែរអគ្គនាយកដ្ឋានបច្ចេកទេសនៃក្រសួងសុខាភិបាលបាននាំយកថ្នាំបន្សាបមកប្រគល់ជូនអភិបាលខេត្តកំពង់ឆ្នាំងក៏ដូចជាប្រធានមន្ទីរសុខាភិបាលខេត្តកំពង់ឆ្នាំងចំនួនមួយ១.០០០ដបសម្រាប់ព្យាបាលដល់ជនរងគ្រោះដោយសារការពុលស្រាស,ស្រាថ្នាំនេះ៕សហការី
