ភ្នំពេញៈនៅខេត្តកំពង់ឆ្នាំងមានករណីពុលទឹកដែលហូរពីការបាញ់ថ្នាំដាក់ចម្ការឪឡឹកបណ្តាលឱ្យមនុស្សចំនួន៣៤នាក់ដឹកយកទៅសង្គ្រោះនិងពីរនាក់បានស្លាប់។ករណីនេះបានកើតឡើងនៅចម្ការឪឡឹកភូមិជីប្រ៉ងឃុំជៀបស្រុកទឹកផុសខេត្តកំពង់ឆ្នាំងកាលពីថ្ងៃទី២៨ខែវិច្ឆិកាឆ្នាំ២០២០។
ប្រភពព័ត៌មានបានឱ្យដឹងកាលពីព្រលប់ថ្ងៃទី២៨ខែវិច្ឆិកានេះថាៈមានករណីពុលទឹកដោយសារថ្នាំបាញ់ នៅចម្ការឪឡឹក។ប្រជាពលរដ្ឋរងគ្រោះបានដកទឹកអណ្តូងមកផឹកក៏បណ្តាលឱ្យពុលជាបន្តបន្ទាប់សរុបចំនួន៣៤នាក់។ក្នុងនោះស្លាប់ពីរនាក់និងអ្នកមានអាការៈធ្ងន់១១នាក់នៅមណ្ឌលសុខភាពអភិវឌ្ឍន៍មានបុរសចំនួន២២នាក់កំពុងសង្គ្រោះបឋម។មន្ទីរសុខាភិបាលខេត្តកំពង់ឆ្នាំងកំពុងបញ្ជូនអ្នកមានអាការៈពុលធ្ងន់ ចំនួន៤នាក់ទៅសង្គ្រោះ នៅមន្ទីរពេទ្យកាល់ម៉ែត រាជធានីភ្នំពេញ។
ប្រភពបានបន្តថាៈចំពោះពលរដ្ឋដែលរងការពុលទឹកអណ្តូងនេះអាជ្ញាធរមិនទាន់បានបញ្ជាក់ឈ្មោះនៅទីលំនៅឱ្យដឹងនៅឡើយទេ។ បន្ទាប់ពីទទួលបានព័ត៌មាននេះភ្លាម លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានចាត់ក្រុមការងារ ដឹកនាំដោយលោកសាស្ត្រាចារ្យ ស៊ា ហួង រដ្ឋលេខាធិការ ក្រសួងសុខាភិបាល ។
ជាមួយនោះរួមដំណើរដោយលោកវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល និងលោកវេជ្ជបណ្ឌិត ង៉ូវ កាង អគ្គាធិការរង នៃអគ្គាធិការដ្ឋាន ក្រសួងសុខាភិបាល ធ្វើដំណើរចុះជួយពិនិត្យ និងអន្តរាគមន៍ជួយជាបន្ទាន់។ ដោយតម្រូវឱ្យធ្វើដំណើរ ទាំងយប់នេះ និងបានពិភាក្សា ជាមួយអភិបាលខេត្តកំពង់ឆ្នាំង៕សហការី