សៀមរាប៖សមត្ថកិច្ចបានតាមចាប់វាយខ្នោះឪពុកចុងដែលយកកាំបិតប៉័ងតោអារ.កសម្លាប់កូនដើមភេទប្រុសទើបអាយុ៣ឆ្នាំ។
មន្ត្រីសមត្ថកិច្ចបានឱ្យដឹងថាករណីមនុស្សឃាតដោយយកកាំបិតអារ.កកូនអាយុ៣ឆ្នាំនេះបណ្តាលឱ្យស្លាប់បានកើតឡើងនៅក្នុង បន្ទប់ផ្ទះជួល ម្តុំខាងក្រោយសាលារៀន បន្ទាយចាស់ ស្ថិតភូមិចុងកៅស៊ូសង្កាត់ស្លក្រាមក្រុងសៀមរាបកាលពីរំលងអធ្រាត្រយប់ចូលថ្ងៃទី៩ខែវិច្ឆិកាឆ្នាំ២០២០។
ប្រភពបន្តថាជនដៃដល់ឈ្មោះខឿនវីឡាភេទប្រុសអាយុ២៨ឆ្នាំមុខរបរកម្មករសំណង់មានស្រុកកំណើត ភូមិជ្រៃធំ ឃុំជ្រៃធំ ស្រុកខ្សាច់កណ្តាល ខេត្តកណ្តាល។ជនដៃដល់ បានយកកាំបិត បុ័ងតោ អារ.ក កូនពីខាង ក្រោយ បណ្តាលឱ្យស្លាប់ ក្រោយ ពេលបញ្ជូន ទៅដល់មន្ទីរពេទ្យគន្ឋបុប្ផា។
បន្ទាប់ធ្វើសកម្មភាព ជនដៃដល់បានជិះកង់គេចខ្លួន តែត្រូវកម្លាំងនគរបាលមូលដ្ឋាន និងប្រជាការពារ តាមចាប់វាយខ្នោះ នៅប៉ុន្មាននាទីក្រោយ។
មន្ត្រីដដែលបានបន្តថាក្មេងរងគ្រោះឈ្មោះ ឌឿ សុបញ្ញា ភេទប្រុស អាយុ ៣ឆ្នាំ និងម្តាយឈ្មោះ ឌឿ សុផាអាយុ២១ឆ្នាំមុខរបរលក់ដូរស្នាក់ផ្ទះជួលកន្លែងកើតហេតុ។ជនសង្ស័យក្រោយពេលឃាត់ខ្លួនបាននាំយកមកសាកសួរតែពុំទាន់យកចម្លើយបានទេព្រោះឆ្លើយវង្វេងវង្វាន់មិនដឹងខុសត្រូវ គឺបែកថ្នាំញៀន ដោយបានធ្វើតេសគឺវិជ្ជមាន។
មន្ត្រីនគរបាលបានបន្តថាតាមការសាកសួរស្ត្រីជាម្តាយពេលនាងកំពុងបោកខោអាវស្រាប់តែឮសំឡេងកូនស្រែក ពេលស្ទុះមកមើល ក៏ឃើញ ប្តីកំពុងកាន់កាំបិតអារ.ក កូនដែលដេកផ្កាប់មុខនៅលើគ្រែ។ ភ្លាមនោះក៏ស្រែកឱ្យគេជួយ និង យកកូនទៅពេទ្យ តែពេលទៅដល់ពេទ្យ កូនបានស្លាប់ទៅហើយ។
ទោះយ៉ាងណា មកដល់រសៀលថ្ងៃដដែលនេះ សមត្ថកិច្ចនៅពុំទាន់យកចម្លើយពីជនដៃដល់នៅឡើយទេ ដោយជននេះស្ថិតក្នុងស្ថានភាពបែកថ្នាំ៕សហការី
