ភ្នំពេញ៖ ក្រសួងធនធានទឹក និងឧតុនិយមបានឱ្យដឹងថា៖ ព្យុះអេតូ (ETAU)កំពុងស្ថិតនៅក្នុងសមុទ្រចិនខាងត្បូង និងបង្កើនឥទ្ធិពលទៅជាកូនព្យុះទី ២១។ បើតាមការតាមដាន ព្យុះនេះនឹងថមថយឥទ្ធិពលទៅជាវិសម្ពាធ ពេលចូលដល់ឆ្នេរភាគខាងត្បូងប្រទេសវៀតណាម ហើយបន្ទាប់មកជាវិសម្ពាធទាបពេលចូលមកដល់ភាគខាងកើតប្រទេសកម្ពុជានៅថ្ងៃ១១វិច្ឆិកា២០២០។
យោងតាមការជូនដំណឹងរបស់ក្រសួងធនធានទឹកចាប់ពីថ្ងទី១០ដល់១២វិច្ឆិកាដោយបានបញ្ជាក់ថា៖ បណ្តារាជធានីខេត្តនៅតំបន់ខ្ពង់រាប ភាគឦសាន ខេត្តភាគខាងកើតជាប់ព្រំដែនប្រទេសវៀតណាម និងខេត្តភាគខាងត្បូងអាចមានកម្រិតភ្លៀងខ្យល់ពីបង្គួរទៅច្រើន។ បណ្តាខេត្តនៅតំបន់មាត់សមុទ្រ នឹងអាចមានភ្លៀងខ្យល់ពីកម្រិតតិចទៅបង្គួរ និងរលកសមុទ្រមានកម្ពស់មធ្យម៕សហការី