ខេត្តមណ្ឌលគិរី៖កាលពីព្រឹកថ្ងៃទី២២ខែធ្នូឆ្នាំ២០២០នេះក្រុមមន្ត្រីជំនាញការពារអ្នកប្រើប្រាស់កិច្ចការប្រកួតប្រជែងនិងបង្ក្រាបការក្លែងបន្លំសាខាខេត្តមណ្ឌលគិរី(ក.ប.ប)បានចុះពិនិត្យការលក់ដូររបស់អាជីវករក្នុងផ្សារនិងណែនាំកុំឱ្យយកឈ្មោះមណ្ឌលគិរីមកប្រើប្រាស់ក្លែងបន្លំដែលអាចនាំឱ្យខូចឈ្មោះដល់ផលិតផលជាទូទៅក្នុងខេត្តមណ្ឌលគិរី។
លោកណាល់វិចិត្រប្រធានសាខាការពារអ្នកប្រើប្រាស់កិច្ចការប្រកួតប្រជែងនិងបង្ក្រាបការក្លែងបន្លំបានដឹកនាំកម្លាំងចុះណែនាំអាជីវករដែលលក់បន្លែផ្លែឈើនិងផលិតផលសម្រេចឱ្យបានត្រឹមត្រូវនិងប្រាប់ពីប្រភពពិតប្រាកដដល់អ្នកទិញចៀសវាងការក្លែងបន្លំប្រភព។
លោកណាល់វិចិត្របានឱ្យដឹងថា៖មន្ត្រីរបស់លោកបានសហការជាមួយមន្ទីរពាណិជ្ជកម្មខេត្តនិងអាជ្ញាធរដែនដីចុះត្រួតពិនិត្យគុណភាពសុវត្ថិភាពផលិតផលទំនិញវេចខ្ចប់គ្រឿងកំប៉ុងម៉ាស់អាល់កុលជែលលាងដៃសម្លាប់មេរោគ។ជាមួយនោះស្រាវជ្រាវផលិតផលបារីម៉ាកJetក្នុងផ្សារសែនមនោរម្យតាមម៉ាតហាងលក់ទំនិញនិងឱសថស្ថានជុំវិញផ្សារសែនមនោរម្យស្ថិតក្នុងសង្កាត់ស្ពានមានជ័យក្រុងសែនមនោរម្យ ។
មន្ត្រីជំនាញបញ្ជាក់ថា៖ការចុះពិនិត្យទំនិញនិងបន្លែផ្លែឈើជាច្រើនមុខនេះជាលទ្ធផលគឺក្រុមការងារបានសង្កេតឃើញថាតម្លៃម៉ាស់ជែលនិងអាល់កុលលក់មានការឡើងថ្លៃបន្តិចបន្តួចក្នុងអំឡុងពេលដែលត្រូវធ្វើចត្តាឡីស័ក។តែពេលនេះត្រឡប់មកសភាពដូចធម្មតាវិញហើយ។ដោយឡែកបារីម៉ាកJetមិនមានចរាចរលក់ក្នុងខេត្តមណ្ឌលគិរីនេះទេ៕សហការី
