អាកាសធាតុចាប់ផ្តើមចុះត្រជាក់ជាហេតុនាំឱ្យប្រជាពលរដ្ឋនាំគ្នាទិញខោអាវរងាជជុះត្រៀមបង្ការការពារទប់ស្កាត់។ប្រជាពលរដ្ឋប្រុសស្រីជាច្រើនរស់នៅក្នុងក្រុងបាត់ដំបងបានលើកឡើងប្រហាក់ប្រហែលគ្នាកាលពីព្រឹកថ្ងៃទី៦ខែធ្នូឆ្នាំ២០២០ថា៖អាកាសធាតុចាប់ផ្តើមប្រែប្រួលចុះត្រជាក់បង្គួររយៈពេល២,៣ថ្ងៃ។
ពលរដ្ឋបានបន្តថាៈជាមួយនោះមានលាយឡំខ្យល់ហួតហែងយ៉ាងខ្លាំងចាំបាច់តម្រូវឱ្យពួកគាត់ប្រញាប់ប្រញាល់ស្វែងរកទិញដូចជា:មួកអំបោះចាក់ស្រោមដៃស្រោមជើងខោអាវរងាក្រាស់ៗដើម្បីទប់ទល់នឹងអាកាសធាតុធ្លាក់ត្រជាក់នេះ។ពិសេសត្រៀមបង្ការសម្រាប់ឪពុក ម្តាយ ជីដូនជីតាដែលមានអាយុច្រើន ព្រមទាំងកូន និងចៅតូចៗជាដើម។
អ្នកស្រីចិន្តានៅក្រុងបាត់ដំបងបានប្រាប់ឱ្យដឹងថា៖អាកាសធាតុចាប់ផ្តើមប្រែប្រួលត្រជាក់តាមរដូវកាលជាបន្តបន្ទាប់មួយរយ:ពេលចុងក្រោយមកនេះមានភាពបានត្រជាក់គួរសម។ពិសេសពេលព្រឹកព្រលឹមនិងពេលយប់។ដើម្បីទប់ទល់នឹងភាពត្រជាក់នេះលោកស្រីបានមកកាន់ផ្សារបឹងឈូកក្នុងក្រុងបាត់ដំបងដើម្បីរកទិញខោឬអាវរងាព្រោះឆ្នាំនេះអាកាសធាតុត្រជាក់ខ្លាំងជាងឆ្នាំកន្លងទៅនិងអូសបន្លាយពេលយូរទៀត។
អាកាសធាតុធ្លាក់ទាបគ្របដណ្តប់ទាំងស្រុងលើខេត្តបាត់ដំបងជាច្រើនថ្ងៃមកនេះគេសង្កេតឃើញប្រជាពលរដ្ឋជាច្រើនខ្នះខ្នែងស្វែងរកទិញសំលៀកបំពាក់ខោអាវរងាក្រាស់ៗយ៉ាងពពាក់ពពួននៅតាមបណ្តាទីផ្សារនានាដួចជាផ្សារបឹងឈូក,ផ្សារលើ,ឬផ្សារ១៣មករា។
លោកឡុងផល្គុណប្រធានមន្ទីរធនធានទឹកនិងឧតុនិយមខេត្តបាត់ដំបងបានបញ្ជាក់ឱ្យដឹងដែរថា៖កាលពីថ្ងៃទី៦ខែធ្នូឆ្នាំ២០២០នៅតំបន់ទីប្រជុំជននានាអាកាសធាតុត្រជាក់មានសីតុណ្ហភាព២០អង្សាសេ។នៅតំបន់ព្រៃជួរភ្នំដូចជាស្រុកសំឡូតជាដើមផងនោះអាកាសធាតុត្រជាក់ធ្លាក់ទាបមានសីតុណ្ហភាពចន្លោះពី ១៨-១៩អង្សាសេអាកាសធាតុបែបនេះនឹងបន្តអូសបន្លាយរយ:ពេលយូរជាងឆ្នាំកន្លងទៅ ៕សហការី