ស្ទឹងត្រែង៖ចៅក្រមស៊ើបសួរនៃតុលាការខេត្តស្ទឹងត្រែងបានសម្រេចឃុំខ្លួនបុរសអ្នកកាសែតម្នាក់ពាក់ព័ន្ធករណីដឹកជញ្ជូនឈើខុសច្បាប់ដាក់ពន្ធនាគារជាបណ្ដោះអាសន្នកាលពីថ្ងៃទី១៤ខែវិច្ឆិកាឆ្នាំ២០២០។
គួររំលឹកថាបុរសកាន់កាតកាសែតម្នាក់ត្រូវបានកងរាជអាវុធហត្ថឃាត់ខ្លួនក្នុងពេលចុះបង្ក្រាបរថយន្តកាមរីឆ្លាមដឹកជញ្ជូនឈើចេញពីស្រុកសៀមប៉ាងខេត្តស្ទឹងត្រែងនៅម៉ោងជាង២រសៀលថ្ងៃទី១២វិច្ឆិកាឆ្នាំ២០២០។រថយន្តកាមរីឆ្លាមបានដឹកឈើប្រណីតនិងប្រភេទឈើកម្រក្រញូងពីស្រុកសៀមប៉ាងខេត្តស្ទឹងត្រែងក្នុងបំណងយកលក់នៅស្រុកស្នួលខេត្តក្រចេះតាមកំណាត់ផ្លូវជាតិលេខ៧។
សមត្ថកិច្ចបានដេញស្ទាក់តាំងពីចំណុចដុងក្រឡរហូតដល់ត្រង់ចំណុចមុខវត្តអូរព្រះស្ថិតក្នុងឃុំអូរគ្រៀង ស្រុកសំបូរខេត្តក្រចេះទើបចាប់បាន។នៅក្នុងពេលចុះបង្ក្រាបឈើនោះបុរសម្នាក់បើករថយន្តដឹកឈើបើកប៉ះរថយន្តសមត្ថកិច្ចអស់៣គ្រឿង។កម្លាំងសមត្ថកិច្ចអាវុធហត្ថខេត្តស្ទឹងត្រែងសហការជាមួយកងរាជអាវុធហត្ថខេត្តក្រចេះនិងរដ្ឋបាលព្រៃឈើបង្ក្រាបបាន រថយន្តកាមរីឆ្លាម ព័ណ៌ស្លែ ពាក់ផ្លាកលេខ កំពង់ស្ពឺ 2A-0225 ។
អ្នកបើកបររថយន្តដឹកឈឺឈ្មោះតានសុភ័ក្ត្រជាជំនួយការនិពន្ធនាយករបស់អង្គភាពសារព័ត៌មានមួយក្នុងស្រុកដែលឈរជើងយកព័ត៌មាននៅក្នុងខេត្តក្រចេះ។ក្រោយការឃាត់ខ្លួនជនសង្ស័យរួមជាមួយរថយន្តដឹកឈើក្រញូង ត្រូវបានបញ្ជូនមកកាន់ បញ្ជាការដ្ឋានកងរាជអាវុធហត្ថខេត្តស្ទឹងត្រែង ។
ក្រោយពីសមត្ថកិច្ចកងរាជអាវុធហត្ថខេត្តស្ទឹងត្រែងកសាងសំណុំរឿងទៅឱ្យជំនាញរដ្ឋបាលព្រៃឈើដល់ដៃតុលាការមក។នៅថ្ងៃទី១៤ខែវិច្ឆិកាឆ្នាំ២០២០ចៅក្រមស៊ើបសួរនៃសាលាដំបូងខេត្តបានសម្រេចឃុំខ្លួនបុរសកាន់កាតសារព័ត៌មានពីបទប្រមូលនិងដឹកជញ្ជូនផលអនុផលព្រៃឈើមានដោយកម្រដោយគ្មានលិខិតអនុញ្ញាតព្រៃឈើ៕សហការី
