ចិនម្នាក់បើករថយន្តបុករបាំងថ្មចែកផ្លូវ ក្រឡាប់ផ្ងារកង់ខូចខាតយ៉ាងដំណំ

ភ្នំពេញ៖បុរសចិនម្នាក់បានបើករថយន្តម៉ាកToyota Prius យ៉ាងលឿនជ្រុលទៅបុករបាំងថ្ម ចែកផ្លូវជាតិលេខ៤ពេញទំហឹង បណ្ដាលឱ្យក្រឡាប់ផ្ងារកង់រងការខូចខាតយ៉ាងដំណំ។
គ្រោះថ្នាក់ចរាចរណ៍នេះបានកើតឡើងនៅតាមផ្លូវជាតិលេខ៤ ម្តុំស្ពានអាកាសផ្លូវល្បឿនលឿន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ កាលពីរំលងអធ្រាត្រចូលថ្ងៃទី២៦ ខែមេសា។អ្នកឃើញហេតុការណ៍បានឱ្យដឹងថា ដំបូងរថយន្តម៉ាក Toyota Prius ផ្លាកលេខភ្នំពេញ2AW-2813 បើកតាមផ្លូវជាតិលេខ៤ពីលិចទៅកើតក្នុងល្បឿនលឿន។
មកដល់កន្លែងខាងលើអ្នកបើកបរទំនងខ្វះការប្រុងប្រយ័ត្នបានបុករបាំងថ្មចែកផ្លូវពេញទំហឹង បណ្ដាលឱ្យបាក់របាំងថ្ម២កង់។រីឯរថយន្តបានក្រឡាប់ផ្ងារកង់ម្ខាងរងការខូចខាតយ៉ាងដំណំ។
បន្ទាប់ពីរថយន្តក្រឡាប់តៃកុងជាជនជាតិចិនបានបើកទ្វារលូនចេញពីក្នុងរថយន្តរងរបួសបន្តិចបន្តូចហើយក៏ដើរចេញគេចខ្លួនបាត់។ក្រោយមកសមត្ថកិច្ចជំនាញបានមកយករថយន្តបង្កទៅទុករង់ចាំដោះស្រាយពេលក្រោយ៕