បាត់ដំបង៖ នារសៀលថ្ងៃចន្ទ៧រោចខែ ផល្គុនឆ្នាំខាលចត្វាស័កព. ស. ២៥៦៦ត្រូវនឹងថ្ងៃទី១៣ខែមីនាឆ្នាំ២០២៣ លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្ត បាត់ដំបងបានជួបសម្តែងការ គួរសមនិងសំណេះសំណាលជាមួយឯកឧត្តម Dominic Williams ឯកអគ្គរាជទូតវិសាមញ្ញនិងពេញសមត្ថភាពនៃចក្រភពអង់គ្លេសប្រចាំនៅព្រះរាជាណាចក្រកម្ពជា ព្រមទាំងសហការី ដែលមានលោក សៀង វន្ថា មន្រ្តីផ្នែកកិច្ចការនយោបាយនិងសិទ្ធិមនុស្សនៃស្ថានឯកអគ្គរាជទូត នៅបរិវេណស្នង ការដ្ឋាននគរបាលខេត្តបាត់ដំបងដោយមានលោក លោកស្រីឧត្តមសេនីយ៍ វរសេនីយ៍ជាស្នងការរងនិងមន្រ្តីពាក់ព័ន្ធបានចូលរួមក្នុងពិធិនេះផងដែរ។
ឯកឧត្តម Dominic Williams បានសម្តែងនូវការកោតសរសេីរចំពោះកិច្ចខិតខំប្រឹងប្រែងបំពេញភារកិច្ចរបស់មន្រ្តីនគរបាលទាំងអស់ក្រោមការដឹកនាំបញ្ជារបស់លោកឧត្តមសេនីយ៍ស្នងការ តាំងពីពេលមុននេះរហូតដល់ពេលបច្ចុប្បន្នជាពិសេសជាមួយបញ្ហាទាក់ទងនឹងជនបរទេសក៏ខេត្តបាត់ដំបងមិនមានបញ្ហាអ្វីគួរឱ្យកត់សម្គាល់ដែរ ។
ឯកឧត្តមសង្ឃឹមយ៉ាងម៉ុតមាំថា កិច្ចខិតខំនេះនឹងបន្តឱ្យស្ថានភាពសន្តិសុខ សណ្តាប់ធ្នាប់សង្គមរឹងរឹតតែល្អប្រសេីរថែមទៀតពីពេលនេះរហូតទៅ ដល់ការបោះឆ្នោតជ្រេីសរេីសតំណាងរាស្រ្តដែលនឹងប្រព្រឹត្តិទៅនាពេលខាងមុខ។
លោកឧត្តមសេនីយ៍ទោ ស្នងការបាន ជម្រាបជូន ឯកឧត្តម Dominic Williams ថានៅក្នុងមូលដ្ឋានខេត្ត បាត់ដំបងទាំងមូល ស្ថានភាពសន្តិសុខសណ្តាប់ធ្នាប់សង្គមមិនមានបញ្ហាអ្វីជារឿងធ្ងន់ធ្ងរនោះទេ មានលេចឡេីងនូវករណីបទល្មេីសខ្លះ ដែលករណីទាំងនោះសមត្ថកិច្ចធ្វេីការស្រាវជ្រាវ បង្រ្កាបបានជាបន្តបន្ទាប់ ឬអាចកំណត់មុខសញ្ញាបាននិងឈានទៅធ្វេីការបង្រ្កាប ។
លោកឧត្តមសេនីយ៍ស្នងការបានបញ្ជាក់ជូនថា នៅពេលខាងមុខ សមត្ថកិច្ចនគរបាលនឹងខិតខំបន្តសកម្មភាពរបស់ខ្លួនថែមទៀត ធ្វេីយ៉ាណាធានាបាននូវសន្តិសុខសណ្តាប់ធ្នាប់សង្គមទៅដល់សកម្មភាពគ្រប់គណបក្សនយោបាយទាំងអស់ក៏ដូចសមាជិក សមាជិការនៃគណបក្សនយោបាយទាំងអស់ដែលមានសកម្មភាពនៅក្នុងភូមិសាស្រ្តខេត្តបាត់ដំបង ស្របតាមនីតិវិធីនិងច្បាប់ជាធរមាន ធ្វេីយ៉ាងណាឱ្យបរិយាកាសនៃការបោះឆ្នោតជ្រេីសរេីសតំណាងរាស្រ្តនាពេលខាងមុខប្រកបដោយសុខសុវត្ថិភាព ស្របតាមគោលបំណងនិងសេចក្តីណែនាំរបស់រាជរដ្ឋាភិបាល របស់ក្រសួងមហាផ្ទៃ និងរបស់អគ្គស្នងការដ្ឋាននគរបាលជាតិ៕