កំពង់ឆ្នាំង៖កាលពីថ្ងៃទី៤ខែតុលាឆ្នាំ២០២០សមត្ថកិច្ចខេត្តកំពង់ឆ្នាំងបានឃាត់ខ្លួនបុរសម្នាក់ដែលបើករថយន្តដឹកដីបុកមនុស្សមួយក្រុមដែលឈរជជែកគ្នាលើផ្លូវសាធារណៈបណ្តាលឱ្យរងរបួសធ្ងន់ធ្ងរ ។សមត្ថកិច្ចអនុវត្តតាមបទបញ្ជារបស់ព្រះរាជអាជ្ញាអមសាលាដំបូងខេត្តកំពង់ឆ្នាំង ។
ការឃាត់ខ្លួនជនបង្កឡើងនាពេលវីដេអូឃ្លីបបានបែកធ្លាយកាលពីថ្ងៃទី៣ខែតុលាឆ្នាំ២០២០ខណៈគ្រោះថ្នាក់ចរាចរណ៍នេះបានកើតឡើងតាំងពីថ្ងៃទី២៦ខែកញ្ញាឆ្នាំ២០២០មកម្ល៉េះនៅចំណុចភូមិថ្មីឃុំពានីស្រុកកំពង់ត្រឡាចខេត្តកំពង់ឆ្នាំង។លោកឧត្តមសេនីយ៍ត្រីកេតយ៉ុងស្នងការរងទទួលផែនចរាចរណ៍នៃស្នងការដ្ឋាននគរបាលខេត្តកំពង់ឆ្នាំង ថ្លែងថា អ្នកបើកបររថយន្តដឹកដីឈ្មោះ វើក វន្នី ភេទប្រុស អាយុ២៩ឆ្នាំ រស់នៅភូមិស្ទឹង ឃុំពានី ស្រុកកំពង់ត្រឡាច ខេត្តកំពង់ឆ្នាំង។
ក្រោយកើតហេតុភាគីទាំងសងខាងមិនបានប្តឹងមកសមត្ថកិច្ចទេគឺបានធ្វើការសម្របសម្រួលគ្នាក្រៅប្រព័ន្ធច្បាប់ខណៈខាងរថយន្តចេញសំណងសងថ្លៃព្យាបាលទៅឱ្យខាងយុវជនដែលឈរជជែកគ្នានៅលើផ្លូវសាធារណៈ។ប៉ុន្តែក្រោយកើតហេតុ៣ថ្ងៃទើបខាងភាគីរថយន្តយកលុយទាំងនោះដែលជួយចេញសងថ្លៃព្យាបាលមកប្រគល់សមត្ថកិច្ចនៅស្រុកអធិការកំពង់ត្រឡាចឱ្យជួយដឹងឮ។តែក្រោយមកក៏មានការបង្ហោះនៅលើបណ្ដាញសង្គមហ្វេសប៊ុក ទើបបង្កឱ្យមានការភ្ញាក់ផ្អើល តែម្តង។បន្ទាប់មកសមត្ថកិច្ចនគរបាលចរាចរណ៍បានស៊ើបអង្កេតជាបន្ទាន់ទៅលើករណីនេះដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្តកំពង់ឆ្នាំងនិងឃាត់ខ្លួនជនបង្កបាននៅថ្ងៃទី៤ ខែតុលាឆ្នាំ២០២០។តាមរយៈឃ្លីបវីដេអូថតបានដោយចៃដន្យបង្ហាញថាមនុស្សមួយក្រុមបានឈរជជែកគ្នាលេងលើផ្លូវសាធារណពេលរថយន្តដឹកដីបានស៊ីផ្លេខ្លាំងតែយុវជនរងគ្រោះមិនបានគេចចេញទេទើបបង្កជាគ្រោះថ្នាក់ចរាចរណ៍ តែម្តង ៕សហការី
