ព្រះវិហារ៖ឧត្ដមសេនីយ៍ទោច័ន្ទសុភ័ក្ត្រាមេបញ្ជាការតំបន់ប្រតិបត្តិការសឹករងព្រះវិហារបានជំរុញដល់កម្លាំងគ្រប់បណ្ដាកងឯកភាពចំណុះតំបន់ប្រតិបត្តិការសឹករងព្រះវិហារទាំងអស់ ត្រូវត្រៀមកម្លាំងជាប្រចាំ ដើម្បីអន្តរាគមន៍ចុះជួយសង្គ្រោះពលរដ្ឋដែលជួបហានិភ័យ និងគ្រោះមហន្តរាយផ្សេងៗ ដោយយថាហេតុណាមួយ។
ថ្លែងនៅក្នុងកិច្ចប្រជុំបូកសរុបលទ្ធផល ការងារយោធាសន្តិសុខប្រចាំខែសីហា និងដាក់ចេញទិសដៅអនុវត្តន៍បន្តការងារយោធាសន្តិសុខប្រចាំកញ្ញា ឆ្នាំ២០២០ នៅទីបញ្ជាការ តំបន់ប្រតិបត្តិការសឹករងព្រះវិហារ កាលពីថ្ងៃទី២៦ ខែសីហា ឆ្នាំ២០២០ ដោយលោកមេបញ្ជាការ បានផ្តាំផ្ញើដល់មេបញ្ជាការរង នាយទាហាន នាយទាហានរង និងពលទាហាន នៃតំបន់ប្រតិបត្តិការសឹករងព្រះវិហារទាំងអស់ ត្រូវខិតខំបំពេញភារកិច្ចតាមផ្នែកឱ្យបានល្អប្រសើរ និងមានប្រសិទ្ធភាពខ្ពស់។ ត្រូវរក្សាភាពស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ ។ត្រូវគោរពឱ្យបានម៉ឺងម៉ាត់នូវវិន័យ និងច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ ក៏ដូចជាច្បាប់ និងលិខិតបទដ្ឋានគតិយុត្តពាក់ព័ន្ធផ្សេងៗផងដែរ។
ឧត្តមសេនីយ៍ទោ ច័ន្ទ សុភ័ក្ត្រា បានបញ្ជាក់ថា ក្នុងនាមជាយោធិនត្រូវបន្តយកចិត្តទុកដាក់ឱ្យបានខ្លាំងក្លា និងក្ដាប់សភាពការផ្ទៃក្នុង និងក្រៅតំបន់ដែលខ្លួនទទួលខុសត្រូវ និងអនុវត្តន៍តាមបទបញ្ជារបស់ថ្នាក់លើប្រគល់ជូន ហើយក៏ត្រូវមានការលើកស្ទួយជីវភាពរស់នៅ និងសុខមាលភាពរបស់កងទ័ពជាប្រចាំ និងត្រៀមកម្លាំង មធ្យោបាយ ក៏ដូចជាសម្ភារគ្រប់ប្រភេទដើម្បីចុះជួយសង្គ្រោះប្រជាពលរដ្ឋដែលរងគ្រោះដោយគ្រោះមហន្តរាយ ដែលបង្កឡើងដោយកត្តាមនុស្ស ឬធម្មជាតិ នៅក្នុងភូមិសាស្ត្រទទួលខុសត្រូវឱ្យបានរហ័ស ទាន់ពេលវេលា៕