ភ្នំពេញ៖អ្នកសារព័ត៌មានម្នាក់ក្នុងអង្គភាព”CBNTVOnline”ត្រូវបានជនមិនស្គាល់មុខវៃសម្លាប់រួចគេចខ្លួនបាត់ដោយពុំទាន់ដឹងច្បាស់ថាជារឿងគំនុំឬប្លន់ទ្រព្យសម្បត្តិនៅឡើយទេ។អំពើឃាតកម្មនេះបានកើតឡើងនៅចំណុចផ្លូវបេតុងភូមិព្រៃទាសង្កាត់ចោមចៅ៣ខណ្ឌពោធិ៍សែនជ័យរាជធានីភ្នំពេញកាលពីវេលាម៉ោងជាង២រំលងអធ្រាត្រចូលថ្ងៃទី២៩ខែកញ្ញាឆ្នាំ២០២០ ។
ប្រភពបានឱ្យដឹងថាៈជនរងគ្រោះ គួយ ពិសិត អាយុ២៤ឆ្នាំបច្ចុប្បន្នស្នាក់នៅភូមិទំនប់១សង្កាត់ភ្នំពេញថ្មី ខណ្ឌសែនសុខ និងមានស្រុកកំណើត នៅភូមិទួលមាស ឃុំតាអុង ស្រុកចំការលើ ខេត្តកំពង់ចាម ។
ប្រជាពលរដ្ឋបានប្រាប់អ្នកសារព័ត៌មានថាៈ នៅពេលកើតហេតុ ពួកគាត់ បានឮសំឡេងដួលម៉ូតូប្រាវ តែភ្លាមៗនោះ ពួកគាត់មិនបានចេញ មកក្រៅផ្ទះ ដើម្បីពិនិត្យមើលហេតុការណ៍នោះទេ ។
លុះបន្តិចក្រោយមក ពេលបើកទ្វារចេញមកមើល ស្រាប់តែឃើញមនុស្សម្នាក់ ដេកស្លាប់បាត់ទៅហើយ ។ចំណែកម៉ូតូដួល គឺនៅកណ្ដាលផ្លូវ ក្រៅពីនេះ គ្មានមនុស្សណាម្នាក់ នៅជាមួយសពឡើយ ។
ប្រភពព័ត៌មានពីសមត្ថកិច្ចបានឱ្យដឹងថាៈសមត្ថកិច្ចបានទាក់ទងទៅម្ចាស់ផ្ទះដែលមានកាមេរ៉ាសុវត្ថិភាព ក្បែរកន្លែងកើតហេតុ ដោយបានឃើញថា ជនរងគ្រោះ ត្រូវបានគេវៃ ពីក្រោយ បណ្ដាលឱ្យដួល បោកក្បាលនឹងថ្នល់ស្លាប់ក្នុងថ្លុកឈាម ។ ចំណែកជនដៃដល់ បានគេចខ្លួនភ្លាមៗតែម្ដង ។
នៅព្រឹកថ្ងៃទី២៩ ខែកញ្ញា ឆ្នាំ២០២០ នេះ ពុំទាន់អាចសុំការបញ្ជាក់បន្ថែម ពីលោកវរសេនីយ៍ទោ ម៉ន វុធី អធិការនគរបាល ខណ្ឌពោធិ៍សែនជ័យ បាននៅឡើយទេ ដោយសារទូរស័ព្ទ ចូលគ្មានអ្នកទទួល៕
