បាត់ដំបង៖ កាលពីថ្ងៃពុធ១រោចខែកត្តិ កឆ្នាំខាលចត្វាស័កព.ស.២៥៦៦ ថ្ងៃទី ៩ ខែ វិច្ឆិកាឆ្នាំ២០២២វេលាម៉ោង ២២ និង៣០នាទីនៅចំណុចក្រុមទី១២ ភូមិភ្នំរៃ ឃុំតាតោក ស្រុកសំឡូត ខេត្តបាត់ដំបង អនុវត្តតាមយោបល់បញ្ជាដឹកនាំរបស់លោកឧត្តមសេនីយ៍ ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី កុយ ហៀងស្នងការរងផែនការងារប្រឆាំងគ្រឿងញៀន លោកវរសេនីយ៍ទោ ម៉ែន រីម អធិការនគរបាលស្រុកសំឡូត បានដឹកនាំកម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលស្រុករួមជាមួយកម្លាំងប៉ុស្តិ៍នគរបាលរដ្ឋបាលតាតោកចុះល្បាតក្នុងមូលដ្ឋាននិងបង្ក្រាបបានករណី រក្សាទុកដោយខុសច្បាប់នូវសារធាតុញៀន ០១ករណី ក្នុងបទល្មើសជាក់ស្ដែង ដែលក្នុងកិច្ចប្រតិបត្តិការសមត្ថកិច្ចចាប់ឃាត់ខ្លួនជនសង្ស័យប្រើប្រាស់ដោយខុសច្បាប់នូវសារធាត់ញៀនចំនួន ០១នាក់ឈ្មោះខាន់ ណុក ភេទប្រុស អាយុ៣៩ឆ្នាំរស់នៅចំណុចក្រុមទី០១ភូមិភ្នំរៃ ឃុំតាតោក ស្រុកសំឡូតខេត្តបាត់ដំបង ។
-*វត្ថុតាងចាប់យករួមមាន៖
– ម្សៅក្រាមពណ៌សថ្លាច្រកក្នុងថង់ប្លាស្ទិកពណ៌សថ្លា ចំនួន០១ថង់ទម្ងន់ ៥.២៧ក្រាម(ទាំងសំបក)សង្ស័យមានសារធាតុញៀន
– ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៩ ដែលមានលេខតួ-ម៉ាស៊ីន ND125ME 5560192 ពាក់ស្លាកលេខ បាត់ដំបង 1AH- 6840 ។
បច្ចុប្បន្នជនសង្ស័យខាងលើនគរបាលស្រុកកំពុងរៀបចំសំណុំរឿង បញ្ជូនមកការិយាល័យជំនាញនៃស្នងការដ្ឋាននគរបាលខេត្តបាត់ដំបងអនុវត្តបន្តតាមនីតិវិធី ច្បាប់៕