សៀមរាប៖គ្រោះថ្នាក់ចរាចរណ៍លើផ្ទៃទឹកដោយកាណូតបុកជាមួយកាណូតបណ្តាលឱ្យបុរសជាតៃកុងកាណូតម្នាក់បានស្លាប់ឯតៃកុងកាណូតម្ខាងទៀតបានគេចខ្លួនបាត់។ហេតុការណ៍នេះបានកើតឡើងនៅទន្លចំណុចអូប្រាំជាន់ចុងភូមិតាច្រនៀងឃុំកំពង់ឃ្លាំងស្រុកសូទ្រនិគមកាលពីយប់ថ្ងៃទី១៤ខែកញ្ញា ឆ្នាំ២០២០។
មន្ត្រីនគរបាលស្រុកសូទ្រនិគមបានឱ្យដឹងនៅព្រឹកថ្ងៃទី១៥ខែកញ្ញានេះថាៈករណីគ្រោះថ្នាក់ចរាចរណ៍លើផ្ទៃផ្លូវទឹកនេះ គឺរវាងការណូតម៉ាកកាវ៉ា សំបកស្មាច់បុកគ្នាហើយបណ្ដាលឱ្យស្លាប់ម្នាក់ ជាតៃកុងកាណូត។ជនរងគ្រោះដែលស្លាប់ឈ្មោះរឿមប៉ូភេទប្រុសអាយុ៥៦ឆ្នាំនៅភូមិព្រែកស្រម៉ោចឃុំកំពង់ឃ្លាំងស្រុកសូទ្រនិគមខេត្តសៀមរាប។ចំណែកតៃកុងកាណូតម្ខាងទៀតឈ្មោះព្រុំឆានភេទប្រុស អាយុ៣៩ឆ្នាំ នៅភូមិតាអួស ឃុំកំពង់ឃ្លាំង ស្រុកសូទ្រនិគម ខេត្តសៀមរាបបានរត់គេចខ្លួន។
មន្ត្រីដដែលបានអះអាងថាមូលហេតុបើកបរពេលងងឹតគ្មានភ្លើងក្នុងល្បឿនលឿននិងខ្វះការប្រុងប្រយ័ត្ន។ក្រោយកើតហេតុកាណូតបានយកទៅរក្សាទុកនៅប៉ុស្តិ៍នគរបាលកំពង់ឃ្លាំងរង់ចាំការដោះស្រាយជាក្រោយ៕