ក្រចេះ៖កម្លាំងខណ្ឌរដ្ឋបាលជលផលខេត្តក្រចេះ,ផ្នែករដ្ឋបាលជលផលកាំពី,ផ្នែករដ្ឋបាលជលផលព្រែកប្រសព្វ,សហការជាមួយមន្ត្រីនាយកដ្ឋានកិច្ចការរដ្ឋបាល និងនីតិកម្ម នៃរដ្ឋបាលជលផល។ក្រសួងកសិកម្ម,ក្រុមប្រឹក្សាសង្កាត់, ប៉ុស្តិ៍នគរបាលរដ្ឋបាល, ប្រជាការពារភូមិ និងសហគមន៍នេសាទ,សង្កាត់រកាកណ្តាល,បានចុះត្រួតពិនិត្យបង្ក្រាបបទល្មើសជលផលនៅចំណុចបឹងរំលាច ស្ថិតនៅក្រុងក្រចេះ ខេត្តក្រចេះ នៅថ្ងៃទី១២ ខែកញ្ញា ឆ្នាំ២០២០។
លោក ម៉ុក ពន្លក នាយខណ្ឌជលផលក្រចេះ បានឱ្យដឹងថាៈ ការបង្ក្រាបនេះ កម្លាំងសមត្ថកិច្ច ដកហូត និងរឹបអូសបានវត្ថុតាងល្មើសច្បាប់ មួយចំនួនមានលូស្បៃមុង ចំនួន២៩ មាត់លូ,របាំងស្បៃមុង ចំនួន២៥ខ្សែ ប្រវែង ១.២០០ម, បង្គោលឫស្សីឃ្លៃ ចំនួន ៣៧៥ដើម,។ចាក់លែងត្រីចម្រុះ ចូលបឹងធម្មជាតិវិញ ចំនួន ១១គីឡូក្រាម ហើយវត្ថុតាងល្មើសច្បាប់ទាំងអស់ ត្រូវបានដឹកជញ្ជូន យកទៅថែរក្សាទុក នៅខណ្ឌរដ្ឋបាលជលផល ដើម្បីរង់ចាំសុំគោលការណ៍ សម្រេចពីថ្នាក់ដឹកនាំ។
លោក សូមអំពាវនាវ និងសំណូមពរ ដល់បងប្អូនប្រជាពលរដ្ឋឱ្យចូលរួមគ្នា ជាពិសេសប្រជានេសាទ សូមយោគយល់ និងសុំអោយមាន ការចូលរួម ដើម្បីថែរក្សា ការពារ នូវធនធានជលផល ទាំងអស់គ្នា ជាពិសេសមិនត្រូវយក ឧបករណ៍នេសាទខុសច្បាប់ ដែលច្បាប់ស្ដីពីជលផល បានហាមឃាត់។ ដូចជា ឧបករណ៍ ឆក់ត្រី និងឧបករណ៍នេសាទ ស្បៃម៉ុង ជាឧបករណ៍នេសាទខុសច្បាប់ យ៉ាងធ្ងន់ធ្ងរ កុំយកមកធ្វើការនេសាទ ក្នុងដែនដីនេសាទ ទាំងបឹង, ទន្លេ, ព្រែក, ស្ទឹង និងអូរ ។ព្រោះថា ឧបករណ៍ទាំងនេះ បានបំផ្លិចបំផ្លាញ ទាំងត្រីមេពូជ និងកូនត្រីតូចៗ សូម្បីតែកូនកំពិស ក៏មិនសេសសល់ដែរ ៕
