ព្រះវិហារ៖អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងក្នុងកិច្ចប្រជុំស្ដីពីលទ្ធផលការងារត្រួតពិនិត្យគ្រឿងញៀនឆមាសទី១និងលើកទិសដៅការងារសម្រាប់ឆមាសទី២ ឆ្នាំ២០២០។
ពិធីនេះបានធ្វើឡើងក្រោមអធិបតីភាពលោកថោងសុគន្ធាអគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន,លោកស៊ូសិរីអភិបាលរងខេត្តនិងជាអនុប្រធានគណកម្មាធិការត្រួតពិនិត្យគ្រឿងញៀនខេត្តព្រះវិហារ។ដោយមានការអញ្ជើញចូលរួមពី គណៈប្រតិភូអមដំណើរ ថ្នាក់ដឹកនាំមន្ទីរ អង្គភាព ជុំវិញខេត្ត, កាលពីថ្ងៃទី១កញ្ញាឆ្នាំ២០២០ នៅសាលាខេត្ត ព្រះវិហារ ។
ស្នងការដ្ឋាននគរបាលខេត្តព្រះវិហារ បានឱ្យដឹងថា នៅឆមាសទី១ ឆ្នាំ២០២០នេះ កម្លាំងការិយាល័យប្រឆាំងគ្រឿងញៀនខេត្ត ចុះបង្ក្រាបការចរាចរ គ្រឿងញៀនបាន ២៣ករណី ឃាត់ខ្លួនជនសង្ស័យ ៥០នាក់ ស្រី ៨នាក់ ព្រមទាំងរឹបអូសគ្រឿងញៀន បាន ១ប្រភេទ គឺថ្នាំញៀនក្រាមពណ៌សថ្លា ប្រភេទមេតំហ្វេតាមីន (ICE) ម៉ាទឹកកក ចំនួន ១៥១,៤៧ក្រាម រួមទាំងវត្ថុតាងជាច្រើនទៀត ។
ដោយឡែក អាជ្ញាធរជាតិប្រយុទ្ធប្រឆាំងគ្រឿងញៀន សម្រាប់ឆមាសទី១ ឆ្នាំ២០២០នេះ បង្ក្រាបបទ ល្មើសគ្រឿងញៀនបាន ៥ពាន់ ៤៦៣ករណី កើនលើសឆ្នាំ២០១៩ ចំនួន ១ពាន់ ២៨៨ករណី ។ក្នុងនោះការ បង្ក្រាប ការជួញដូរ ការរក្សាទុក មានចំនួន ៣ពាន់ ៤៤៨ករណី ការប្រើប្រាស់ ១ .៩៧៩ករណី ការដាំដុះ ៣៣ ករណី ការកែច្នៃគ្រឿងញៀន ៣ករណី និងបានឃាត់ខ្លួនជនសង្ស័យ ១០ពាន់ ៨៧៧នាក់ ក្នុងនោះស្ត្រី ៦៨៧ នាក់ ។
អភិបាលរងខេត្ត និងជាអនុប្រធានគណកម្មាធិការ ត្រួតពិនិត្យគ្រឿងញៀនខេត្តព្រះវិហារ លោក ស៊ូ សិរីបានថ្លែងកោតសរសើរពីកិច្ចខិតខំប្រឹងប្រែងរបស់មន្ត្រីនគរបាលយុត្តិធម៌និងគណៈកម្មាធិការប្រយុទ្ធ ប្រឆាំងគ្រឿងញៀនខេត្ត ក្នុងការទប់ស្កាត់ និងបង្ក្រាបការជួញដូរ ការចែកចាយ និងការប្រើប្រាស់គ្រឿង ញៀន នៅក្នុងខេត្តព្រះវិហារនេះ ។
លោកថោងសុគន្ធាអគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញទិសដៅការងារត្រួតពិនិត្យគ្រឿងញៀន សម្រាប់ការអនុវត្តន៍ នៅក្នុងឆមាសទី២ ឆ្នាំ២០២០ ដល់គណៈកម្មាធិការប្រយុទ្ធប្រឆាំងគ្រឿងញៀនថ្នាក់ខេត្ត។មន្ត្រីនគរបាល យុត្តិធម៌ទាំងអស់ ត្រូវបន្តអប់រំ និងផ្សព្វផ្សាយ ពីការបង្ការទប់ស្កាត់ការចរាចរ និងការប្រើប្រាស់គ្រឿងញៀន ឱ្យបានខ្លាំងក្លាជាងនេះថែមទៀត៕
