ព្រះវិហារ៖កាលពីរសៀលថ្ងៃទី១ខែកញ្ញាឆ្នាំ២០២០លោកប្រាក់សុវណ្ណអភិបាលខេត្តព្រះវិហារបានដាក់បញ្ជាដល់អាជ្ញាធរដែនដីក្រុងស្រុកឃុំសង្កាត់ក៏ដូចជាសមត្ថកិច្ចជំនាញពាក់ព័ន្ធផ្សេងៗត្រូវយកចិត្តទុកដាក់ខិតខំបង្ក្រាបបទល្មើសគ្រប់ប្រភេទពិសេសបទល្មើសឆ្លងដែនខុសច្បាប់ឱ្យមានប្រសិទ្ធភាពខ្ពស់។
លោក ប្រាក់ សុវណ្ណ បានថា ដោយអនុវត្តន៍តាមការណែនាំរបស់ប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី ក៏ដូចជាបទបញ្ជាសម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ។អាជ្ញាធរខេត្តព្រះវិហារតែងតែបានដាក់បទបញ្ជាដល់អាជ្ញាធរក្រុងស្រុកនិងសមត្ថកិច្ចពាក់ព័ន្ធផ្សេងៗក្នុងខេត្តត្រូវខិតខំបង្ក្រាបបទល្មើសផ្សេងៗឱ្យមានប្រសិទ្ធភាពក្នុងដែនសមត្ថកិច្ចរបស់ខ្លួន។
លោកអភិបាលខេត្តបានបន្តថាមួយរយៈនេះបទល្មើសផ្សេងៗក្នុងខេត្តព្រះវិហារហាក់មានការថមថយគួរឱ្យកត់សម្គាល់។ក្នុងនោះមានបទល្មើសគ្រឿងញៀនល្បែងស៊ីសងក៏ដូចជាបទល្មើសដឹកជញ្ជូនធនធានធម្មជាតិផងដែរតែបទល្មើសខ្លះទៀតក៏នៅតែកើតមានដដែល។ករណីនេះលោកបានដាស់តឿនដល់មន្ត្រីអនុវត្តន៍ត្រូវខិតខំបន្ថែមទៀតដោយឈរលើស្មារតីទទួលខុសត្រូវខ្ពស់ចំពោះមុខងារនិងតួនាទីរបស់ខ្លួន។
ជាមួយគ្នានោះ លោក ប្រាក់ សុវណ្ណ ក៏បានលើកឡើងចំពោះការនាំសត្វចូលពីប្រទេសឡាវ មកស្តុកទុកនៅឃុំកំពង់ស្រឡៅស្រុកឆែបសម្រាប់បែងចែកដឹកជញ្ជូនលក់ទៅកាន់ទីផ្សាក្នុងស្រុក។ដែលព័ត៌មានបានចុះផ្សាយប៉ុន្មានថ្ងៃមុននោះគឺលោកបានដាក់បទបញ្ជាដល់អាជ្ញាធរស្រុកឆែបឱ្យធ្វើកិច្ចការនេះ។លោកបានបន្តថាក្នុងនាមថ្នាក់ដឹកនាំខេត្តលោកមិនអនុញ្ញាតឱ្យមានការនាំចូលទំនិញឆ្លងដែនខុសច្បាប់មកចែកចាយក្នុងស្រុកជាដាច់ខាត។ដូច្នេះអាជ្ញាធរក្រុងស្រុកនិងសមត្ថកិច្ចពាក់ព័ន្ធត្រូវពិនិត្យឱ្យបានច្បាស់លាស់ និងបង្ក្រាបឱ្យខាងតែបាន៕
