ពោធិ៍សាត់៖ សមត្ថកិច្ច នៃគណៈបញ្ជាការឯកភាព ខេត្តពោធិ៍សាត់ បានឃាត់ខ្លួន មនុស្សប្រុសស្រី ៧នាក់ និងមេការម្នាក់ ព្រមទាំងបានរឹបអូស យកវត្ថុតាងមួយចំនួនទៀត នៅពេលសមត្ថកិច្ចចម្រុះចូលបង្ក្រាបទីតាំង ហ្គេមអនឡាញ មួយកន្លែង ។
ប្រតិបត្តិការនេះ ដឹកនាំដោយ លោក ម៉ៅ ធនិន អភិបាលខេត្តពោធិ៍សាត់ និងមានការសម្របសម្រួល ពីព្រះរាជអាជ្ញា សាលាដំបូង ខេត្តពោធិ៍សាត់ និងកម្លាំងសមត្ថកិច្ចជំនាញ ខេត្តពោធិ៍សាត់ នៅវេលាម៉ោង ៧ និង ៣០ នាទី យប់ថ្ងៃទី ២៤ ខែសីហា ឆ្នាំ២០២០ ស្ថិតនៅក្នុង ភូមិបន្ទាយដីក្រោម សង្កាត់បន្ទាយដី ក្រុង-ខេត្តពោធិ៍សាត់។
អធិការនគរបាល ក្រុងពោធិ៍សាត់ បានឱ្យដឹង តាមរយៈទូរស័ព្ទ នៅរសៀល ថ្ងៃទី២៥ ខែសីហា នេះថាៈ នៅក្នុងកិច្ចប្រតិបត្តិការ ឆ្មក់ចូលបង្ក្រាបទីតាំង ល្បែងហ្គេម អនឡាញមួយកន្លែង ទាំងយប់ នេះ សមត្ថកិច្ចចម្រុះ បានខ្លួនមនុស្សប្រុសស្រី ៧ នាក់ រួមនឹងមេការម្នាក់ និងទូហ្គេម ៥ គ្រឿង (ធំ២ តូច៣) កុំព្យូទ័រលើតុ ៧ គ្រឿង កាមេរ៉ា ១ឈុត លុយខ្មែរ ១.៣៨៥.០០០ រៀល និងលុយអាមេរិក ៧៥ ដុល្លារ ។
អធិការនគបាល ក្រុងពោធិ៍សាត់ បានអោយដឹងទៀតថាៈ ក្រោយការបង្ក្រាប ជនសង្ស័យប្រុសស្រី ៧ នាក់ រួមនឹងមេការ និងរឹបអូសសម្ភារទាំងអស់ ត្រូវបានសមត្ថកិច្ច នគរបាលក្រុងពោធិ៍សាត់ នាំយកមកអធិការដ្ឋាន ដើម្បីសាកសួរ និងកសាងសំណុំរឿង បញ្ជូនបន្តទៅស្នងការដ្ឋាន នគបាលខេត្តពោធិ៍សាត់ ដើម្បីបញ្ជូនបន្ត ទៅសាលាដំបូង ខេត្តពោធិ៍សាត់ ចាត់ការតាមនីតិវិធី៕
