ស្ទឹងត្រែង:រោងសិប្បកម្មកែច្នៃឈើប្រណីតដ៏ធំមួយកន្លែងត្រូវបានភ្លើងឆាបឆេះសល់តែគំនរផេះកាលពីរំលងអាធ្រាត្រឈានចូលថ្ងៃទី១៨ខែសីហាឆ្នាំ២០២០។ករណីនេះបានកើតឡើងនៅភូមិព្រែកសង្កាត់ស្ទឹងត្រែងក្រុងស្ទឹងត្រែងខេត្តស្ទឹងត្រែង។
តាមប្រភពព័ត៌មានពីកម្មករដែលស្នាក់នៅក្នុងរោងសិប្បកម្មបានប្រាប់សមត្ថកិច្ចឱ្យដឹងថាអគ្គិភ័យនោះសង្ស័យបណ្ដាលមកពីទុស្សេខ្សែភ្លើងឆេះរាលដាលរោងសិប្បកម្មទាំងមូល។ឃើញដូចនោះក្រុមកម្មករក៏បានយកទឹកពន្លត់ហើយកម្លាំងនគរបាលពន្លត់អគ្គិភ័យរបស់ស្នងការដ្ឋាននគរបាលខេត្តស្ទឹងត្រែងក៏បានយករថយន្តជួយអន្តរាគមន៍។ក៏ប៉ុន្តែដោយសារស្ថានភាពភ្លើងបានឆាបឆេះដែលមានទំហំខ្លាំងធ្វើឱ្យការគ្រប់គ្រងតាំងពីវេលាម៉ោងជាង២រំលងអធ្រាត្ររហូតដល់ម៉ោង ៥ព្រឹកទើបរលត់។
រោងសិប្បកម្មដ៏ធំមួយនោះគឺបាំងក្តានិងដំបូលប្រក់ដែកស័ង្កសីដែលមានទំហំធំ។នៅក្នុងរោងសិប្បកម្មនោះគ្រឿងសង្ហារឹមតុទូសាឡុងដែលមានតម្លៃរាប់ពាន់ដុល្លារនៅសេសសល់ក៏ត្រូវបានភ្លើងឆេះរួមទាំងម៉ាស៊ីនសម្រាប់អាជ្រៀកឈើមួយចំនួនក៏ចេះផងដែរ។អគ្គិភ័យដែលបានឆាបឆេះរោងសិប្បកម្មដ៏ធំនៅក្នុងក្រុងស្ទឹងត្រែងមួយនេះសមត្ថកិច្ចមិនទាន់បានបញ្ជាក់ពីទំហំនៃការខាតបង់នៅឡើយទេបើគិតរហូតមកដល់ព្រឹកថ្ងៃទី១៨ខែសីហាឆ្នាំ២០២០។
ប្រភពព័ត៌មានបានឱ្យដឹងទៀតថាម្ចាស់សិប្បកម្មឈ្មោះសុខឃឿនគឺជាជនជាតិខ្មែរវៀតណាម។សិប្បកម្មដ៏ធំមួយនេះកន្លងមកសមត្ថកិច្ចធ្លាប់បានចុះពិនិត្យរាប់ភ្លេចរួចមកហើយ។នៅក្នុងហេតុការណ៍ភ្លាមនោះត្រូវបានគេឱ្យដឹងថាម្ចាស់សិប្បកម្មខាងលើពុំបាននៅកន្លែងកើតហេតុឡើយ៕
