បន្ទាយមានជ័យ៖កងកម្លាំងទាហានថៃបានឃាត់និងបញ្ជូនពលករខ្មែរដែលចូលប្រទេសគេឱ្យត្រឡប់មកស្រុកវិញ។ប្រភពព័ត៌មានបានឱ្យដឹងកាលពីថ្ងៃទី១៧ខែសីហាឆ្នាំ២០២០ថា៖កម្លាំងទាហានឈុតខ្មៅថៃបានចាប់ខ្លួនពលករខ្មែរដែលលួចចូលទៅប្រទេសថៃដោយខុសច្បាប់បានចំនួន៤នាក់ត្រង់បរិវេណព្រំដែនភូមិដុងងូឃុំប៉ារ៉ៃស្រុកអារញ្ញ។
ដោយឡែកនៅបរិវេណភូមិខ្លងវ៉ាឃុំថាប់ព្រិកស្រុកអារញ្ញកងកម្លាំងថៃក៏ចាប់ខ្លួនពលករខ្មែរលួចចូលប្រទេសដោយខុសច្បាប់ បានចំនួន៧នាក់ទៀត។បន្ទាប់មកនៅយប់ដដែលនោះវេលាម៉ោង៩និង៣០នាទី កម្លាំងទាហានថៃសហការជាមួយកម្លាំងនគរបាលស្រុកតាព្រះយ៉ា។បានដើរល្បាតតាមបន្ទាត់ព្រំដែនកម្ពុជា-ថៃរហូតដល់ម៉ោង២១,៣០នាទីនៅបរិវេណអូរសងណាំភូមិខ្លងផេងឃុំទ័ពស្ដេចស្រុកតាព្រះយ៉ាខេត្តស្រះកែវក៏ប្រទះឃើញពលករខ្មែរកំពុងដើរចូលប្រទេសថៃទើបចាប់ខ្លួនពលករខ្មែរបានចំនួន២៤នាក់/ស្រី៩នាក់។
ពលករខ្មែរទាំងអស់ចូលទៅប្រទេសថៃតាមច្រករបៀងដើម្បីទៅរកការងារធ្វើព្រោះជីវភាពពួកគេជួបការលំបាកក្នុងអំឡុងការរីករាលដាលជំងឺកូវីត១៩។កងកម្លាំងបានបញ្ជូនពលករខ្មែរឱ្យសមត្ថកិច្ចជំនាញអនុវត្តតាមច្បាប់បន្ត៕
