ព្រះវិហារ៖សមត្ថកិច្ចចុះបង្ក្រាបទីតាំងល្បែងស៊ីសងបាញ់អាប៉ោងមួយកន្លែងនៅក្នុងភូមិស្រឯមជើងឃុំស្រឯមស្រុកជាំក្សាន្តខេត្តព្រះវិហារ។ក្នុងនោះឃាត់ខ្លួនបានជនញៀនល្បែងមនុស្សប្រុសស្រីចំនួន៩នាក់បញ្ជូនទៅស្នងការដ្ឋាននគរបាលខេត្តព្រះវិហារ កាលពីថ្ងៃទី១៩ខែកក្កដាឆ្នាំ២០២០។
លោកវរៈសេនីយ៍ឯកគង់គានាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តព្រះវិហារបានឱ្យដឹងថា៖ក្នុងប្រតិបត្តិការចុះបង្ក្រាបទីតាំងល្បែងបាញ់អាប៉ោងដែលបានលួចលាក់បើកកន្លែងលេងល្បែងស៊ីសងជាយូរណាស់មកហើយ។លោកបានបន្តថា៖សមត្ថកិច្ចបានធ្វើការស៊ើបអង្កេតអស់មួយរយៈទើបឈានទៅបង្ក្រាបតែម្តង។
សមត្ថកិច្ចបានឃាត់ខ្លួនមនុស្សប្រុសស្រីចំនួន៩នាក់ដកហូតរថយន្ត៥គ្រឿងម៉ូតូ១គ្រឿងគ្រាប់អាប៉ោង១៥គ្រាប់ចានបាញ់អាប៉ោង២និងសម្ភារក្នុងវង់ល្បែងស៊ីសងមួយចំនួនទៀតបញ្ជូនមកកាន់ស្នងការដ្ឋាននគរបាលខេត្តព្រះវិហារ ។ លោកបន្តថា ម្ចាស់ផ្ទះបើកល្បែងបាញ់អាប៉ោងជាគ្រូបង្រៀន ឈ្មោះ ហ៊ន ចាន់រ័ត្នអាយុ៣៧ឆ្នាំរស់នៅភូមិស្រឯមជើងឃុំស្រឯមស្រុកជាំក្សាន្តខេត្តព្រះវិហារ។
ក្រោយពីបានសាកសួរមនុស្សប្រុសស្រីទាំង៩នាក់ដែលសមត្ថកិច្ចក៏បានធ្វើកិច្ចសន្យាអប់រំឱ្យត្រឡប់ទៅផ្ទះវិញ។តែជាយ៉ាងនេះក្តីប្រជាពលរដ្ឋនៅឃុំស្រឯមបានលើកឡើងថាក្នុងប្រតិបត្តិការចុះបង្ក្រាបទីតាំងល្បែងបាញ់អាប៉ោងដុះស្លែនេះហាក់បីដូចជាម្ចាស់ផ្ទះមានខ្នងបង្អែកធំណាស់ទើបបានដោះលែងវិញ ត្រឹមតែធ្វើកិច្ចសន្យា អប់រំស្រួលៗបែបនេះ៕
