ព្រះវិហារ៖កម្លាំងរដ្ឋបាលព្រៃឈើព្រះវិហារ,ផ្នែកព្រៃឈើឆែប,សហការណ៍ជាមួយកម្លាំងកងរាជអាវុធហត្ថខេត្តបានចុះឃាត់ទីតាំងស្តុកឈើអត់ច្បាប់២កន្លែង។ក្នុងនោះចាប់រថយន្ត១គ្រឿងដឹកឈើប្រណីតក្នុងភូមិសាស្ត្រភូមិចម្រើនឃុំច្រាចស្រុកជ័យសែននៅថ្ងៃទី២មិថុនាឆ្នាំ២០២០។
លោកនួនសុខុមនាយខណ្ឌរដ្ឋបាលព្រៃឈើព្រះវិហារបានឱ្យអ្នកសារព័ត៌មានដឹងថា៖ការចុះបង្ក្រាបទីតាំងសន្និធិឈើគ្មានច្បាប់ទាំងនោះគឺបានធ្វើឡើងក្រោមកិច្ចសហការណ៍យ៉ាងល្អពីកម្លាំងកងរាជអាវុធហត្ថខេត្ត។ដែលមានលោកឧត្តមសេនីយ៍ត្រីកងសៅគុណជាមេបញ្ជាការ,ដោយលោកឧត្តមសេនីយ៍បានចាត់កម្លាំងក្រោមឧិវាទរួមជាមួយកម្លាំងខណ្ឌរដ្ឋបាលព្រៃឈើខេត្តនិងផ្នែករដ្ឋបាលព្រៃឈើឆែប។
នាយខណ្ឌរដ្ឋបាលព្រៃឈើបានបន្តថាសមត្ថកិច្ចបានចុះទៅកាន់ទីតាំងបើករោងសិប្បកម្មកែច្នៃឈើគ្មានច្បាប់ពីរកន្លែងព្រមទាំងស្ទាក់ចាប់រថយន្តសាំងយ៉ុង១គ្រឿងដែលកំពុងធ្វើសកម្មភាពដឹកជញ្ជូនឈើប្រណីតនៅលើដងផ្លូវក្រាលគ្រួសក្រហម១ខ្សែ នៅក្នុងមូលដ្ឋាននោះទៀតផង។
លោកបន្តថានៅក្នុងការចុះបង្ក្រាបទីតាំងបើករោងសិប្បកម្មកែច្នៃឈើទាំងពីរកន្លែងនោះសមត្ថកិច្ចមិនបានដកហូតម៉ាស៊ីនឈូសឈើតាបឈូសឈើឧបករណ៍កែច្នៃឈើជាច្រើនទៀត។ក៏មិនបានឃាត់ខ្លួនជនប្រព្រឹត្តបទល្មើសទាំងនោះដែរដោយសារពួកគេដឹងខ្លួនមុនពួកគេបានដោះម៉ាស៊ីនទាំងនោះដឹកយកចេញទៅលាក់ទុកហើយពួកគេបានរត់គេចខ្លួនអស់នៅមុនពេលកម្លាំងសមត្ថកិច្ចចុះទៅដល់។
លោកបានបញ្ជាក់ថាក្រោយការបង្ក្រាបកម្លាំងសមត្ថកិច្ចបានដឹកជញ្ជូនឈើនិងនាំយករថយន្តសាំងយ៉ុងដឹកឈើ១គ្រឿងបញ្ជូនមកសង្កាត់រដ្ឋបាលព្រៃឈើជ័យសែន។រីឯឈើដែលដកហូតបានមានច្រើនប្រភេទដូចជាឈើធ្នុងជាដើម។ខណៈនេះមិនទាន់ដឹងពីចំនួនពិតប្រាកដនៅឡើយទេព្រោះមន្ត្រីព្រៃឈើកំពុងធ្វើការដឹកជញ្ជូន និងមិនទាន់បានធ្វើការវាស់វែងនៅឡើយ៕
