កំពតៈគ្រោះថ្នាក់ចរាចរណ៍ដោយរថយន្តបើកបុកអ្នកជិះម៉ូតូបណ្តាលឱ្យ យុវជនម្នាក់ បានស្លាប់គឺអ្នកបើកបររថយន្ត បានគេចខ្លួនបាត់។ ហេតុការណ៍បានកើតឡើងនៅលើដងផ្លូវជាតិលេខ៣ ចន្លោះគីឡូម៉ែត្រលេខ ១០៣-១០៤ស្ថិតក្នុងភូមិដំណាក់ទ្រព្យ ខាងត្បូង ឃុំក្រាំងស្នាយ ស្រុកឈូក ខេត្តកំពតកាលពីរសៀល ថ្ងៃទី១៣ ខែតុលា ឆ្នាំ២០២០ ។
មន្ត្រីនគរបាលចរាចរណ៍ស្រុកឈូក បានប្រាប់ឱ្យដឹងថាៈ យុវជនដែលបាត់បង់ជីវិត ឈ្មោះ យាន អាយុ១៨ឆ្នាំ មានលំនៅ នៅភូមិត្រពាំងចែង ឃុំសំរោង ស្រុកត្រាំកក់ ខេត្តតាកែវ។មុនកើតហេតុ គេឃើញយុវជនរងគ្រោះ បើកម៉ូតូម៉ាក អិចសិនទ័រ ពណ៌លឿង គ្មានស្លាកលេខ ក្នុងទិសដៅពីខាងលិច ទៅខាងកើត។ ស្របពេលនោះ ក៏មានរថយន្តមួយគ្រឿង ម៉ាកតូយ៉ូតា វីហ្គោ ពាក់ស្លាកលេខ ភ្នំពេញ 2w -9406 មកពីមុខ រួចបុកពេញទំហឹង បណ្តាលឱ្យម៉ូតូដួលខ្ទាត ថយក្រោយអូសជាច្រើនម៉ែត្រ។
សមត្ថកិច្ច បានបន្តថាៈ ភ្លាមៗ អ្នកបើកបរ ក៏បើកទ្វាររត់គេចបាត់ ដោយបន្សល់ទុករថយន្ត នៅនឹងកន្លែងកើតហេតុ។ លុះអ្នកដំណើរចូលទៅជួយ ស្រាប់តែឃើញ ភាគីខាងម៉ូតូ បាត់បង់ជីវិតទៅហើយ៕សហការី
