កំពង់ស្ពឺៈ អាជ្ញាធរខេត្តកំពង់ស្ពឺ បានប្រកាសឱ្យប្រជាពលរដ្ឋ ក្នុងស្រុកភ្នំស្រួច ត្រូវប្រុងប្រយ័ត្ន បន្ទាប់ពីមានភ្លៀងធ្លាក់ច្រើន ក្នុងភូមិសាស្ត្រ ជួរភ្នំគីរីរម្យ ហើយបានបាក់ទំនប់ទឹក ដោយសារទឹកហូរច្រោះ ត្រង់ចំណុចចម្ការតែ ខាងលើខ្នងភ្នំគីរីរម្យ ស្ថិតក្នុងភូមិបេង ឃុំចំបក់ ស្រុកភ្នំស្រួច ខេត្តកំពង់ស្ពឺ កាលពីល្ងាច ថ្ងៃទី១៣ ខែតុលា ឆ្នាំ២០២០។មន្ត្រីរដ្ឋបាលសាលាខេត្តកំពង់ស្ពឺ បានឱ្យដឹងថាៈ សូមប្រជាពលរដ្ឋ ដែលរស់នៅក្នុងភូមិសាស្ត្រ ផ្នែកខាងក្រោម ខាងភ្នំគីរីរម្យ ចំនួន ៤ ឃុំ ត្រូវប្រុងប្រយ័ត្ន បន្ទាប់ពីទំនប់ទឹកចំការតែ បានបាក់ ហើយឃុំទាំង៤ ដែលត្រូវប្រុងប្រយ័ត្ននោះ រួមមាន ១.ឃុំចំបក់,២. ឃុំត្រាំងសំរោង,៣.ឃុំតាំងស្យា,៤.ឃុំមហាសាំង ។ដែលមានផ្ទៃដី ជាប់គ្នានិងស្របតាមមាត់ស្ទឹងស្រែខ្លុង ទើបបន្តទឹកខាងនេះ ធ្លាក់ចូលក្នុងស្ទឹងព្រែកត្នោត។ ចំនួនទឹក ដែលបានហូរច្រោះ ទំនប់ទឹកចម្ការតែ រហូតដល់បាក់នេះ មានប្រមាណជាង៥លានម៉ែត្រគូប។ អាជ្ញាខេត្តកំពង់ស្ពឺ បានត្រៀមរួចជាស្រេច ដើម្បីជួយសង្គ្រោះ បងប្អូនប្រជាពលរដ្ឋ ខណៈដែលមានទឹកជំនន់ កើតឡើង៕សហការី
