ព្រះវិហារ៖រដ្ឋបាលខេត្តព្រះវិហារនៅរសៀលថ្ងៃទី២៤ខែកក្កដាឆ្នាំ២០២០បានរៀបចំពិធីជួបសំណេះសំណាលរបស់ថ្នាក់ដឹកនាំនៃក្រសួងមុខងារសាធារណៈជាមួយមន្ត្រីរាជការនៃមន្ទីរមុខងារសាធារណៈខេត្តព្រះវិហារនិងខេត្តឧត្តរមានជ័យ។
ពិធីក្រោមអធិបតីភាពលោកព្រំសុខារដ្ឋមន្ត្រីក្រសួងមុខងារសាធារណៈនិងមានការចូលរួមពីលោកប្រាក់សុវណ្ណអភិបាលខេត្តព្រះវិហារ,លោកឡុងសុវណ្ណប្រធានក្រុមប្រឹក្សាខេត្ត,លោកប៉ែនកុសល្យអភិបាលរងខេត្តឧត្តរមានជ័យនិងប្រធានក្រុមប្រឹក្សាខេត្តឧត្តរមានជ័យ,ប្រធានមន្ទីរនិងមន្ត្រីនៃមុខងារសាធារណៈទាំងខេត្តព្រះវិហារនិងខេត្តឧត្តរមានជ័យជាច្រើនរូបដែលធ្វើឡើងនៅសាលាខេត្តព្រះវិហារ។
ប្រធានមន្ទីរមុខងារសាធារណៈនៃខេត្តទាំងពីរបានរបាយការណ៍រួចមកលោករដ្ឋមន្ត្រីមុខងារសាធារណៈបានថ្លែងកោតសសើរពីការរីកចម្រើនរបស់ខេត្តព្រះវិហារក្រោមគោលនយោបាយរបស់រាជរដ្ឋាភិបាល។លោករដ្ឋមន្ត្រីបានបន្តថា៖មន្ទីរត្រូវបន្តពង្រឹងសមត្ថភាពមន្ត្រីរបស់ខ្លួន ដើម្បីបំពេញនូវតម្រូវការ ការងារបច្ចុប្បន្នឱ្យមានភាពល្អប្រសើរបន្ថែមទៀតស្របតាមកំណែទម្រង់នានារបស់រាជរដ្ឋាភិបាលកម្ពុជា ដែលកំពុងដំណើរការ។
ជាពិសេសកំណែទម្រង់វិជ្ឍការ និងវិសហមជ្ឍការដែលកាន់ស៊ីជម្រៅ ការផ្ទេរ និងប្រគល់មុខងារ ធនធានឱ្យថ្នាក់ក្រោមជាតិតួយ៉ាងថ្នាក់ក្រុងស្រុក។លោករដ្ឋមន្ត្រីបន្តថា៖កំណែទម្រង់មុខងារសាធារណៈពិតជាការងារចាំបាច់និងទំនាក់ទំនងយ៉ាងជិតស្និតលើការងារផ្តល់សេវាសាធារណៈជូនប្រជាពលរដ្ឋយ៉ាងមានប្រសិទ្ធភាពខ្ពស់។លោករដ្ឋមន្ត្រីក៏បានស្នើឱ្យរដ្ឋបាលខេត្តចូលរួមជាមួយរាជរដ្ឋាភិបាលក្នុងបេសកកម្មបង្ការនិងទប់ស្កាត់ជំងឺឆ្លងកូវីដ១៩ឱ្យបានអស់ក្នុងកម្ពុជារក្សានូវសន្តិភាពស្ថេរភាព និងការអភិវឌ្ឍជាតិជានិរន្ត៍៕
