ស្ទឹងត្រែង៖ជនម្នាក់បែកថ្នាំដើរហែកស្លាកគណបក្សអស់បួនផ្ទាំងត្រូវកម្លាំងសមត្ថកិច្ចនគរបាលឃាត់ខ្លួនព្រមទាំងដកហូតបានថ្នាំញៀនមួយចំនួនទៀតនិងបញ្ជូនទៅតុលាការ។ករណីនេះបានកើតមាននៅស្រុកសៀមប៉ាងខេត្តស្ទឹងត្រែងកាលពីថ្ងៃទី៣១ខែឧសភាឆ្នាំ២០២០។
នៅព្រឹកថ្ងៃទី២មិថុនាឆ្នាំ២០២០នេះនគរបាលនៃស្នងការដ្ឋានខេត្តស្ទឹងត្រែងបានបញ្ជូនជនសង្ស័យឈ្មោះរស់ចាន់ពិសិទ្ធិភេទប្រុសអាយុ៣០ឆ្នាំរស់នៅមិនពិតប្រាកដទៅសាលាដំបូងខេត្តស្ទឹងត្រែង។នគរបាលបាននិយាយថាជនសង្ស័យដែលបានឃាត់ខ្លួនធ្វើសកម្មភាពជិះម៉ូតូដើរហែកស្លាកគណបក្សប្រជាជនកម្ពុជានៅឃុំថ្មកែវអស់ចំនួន៤ស្លាកនិងឃុំសេកុងចំនួន២ស្លាក។
ក្រោយមានសេចក្តីរាយការណ៍ពីប្រជាពលរដ្ឋនិងតំណាងគណបក្សឃុំកម្លាំងជំនាញអធិការដ្ឋាននិងប៉ុស្តិ៍រដ្ឋបាលទាំងពីរបានចុះទៅដល់ឃាត់ខ្លួនជនសង្ស័យបញ្ជូនមកអធិការស្រុកនិងបន្តមកស្នងការខេត្ត។សូមបញ្ជាក់ថាឈ្មោះរស់ចាន់ពិសិទ្ធិក្រៅពីជាប់ពាក់ព័ន្ធបំផ្លិចបំផ្លាញទ្រព្យសម្បត្ដិសាធារណៈក៏បានឆែកឆេររកឃើញថ្នាំញៀនWYពណ៌ទឹកក្រូចចំនួន២៩គ្រាប់នៅក្នុងហោប៉ាវខោ។
ជនសង្ស័យខាងលើជាមុខសញ្ញាចែកចាយនិងប្រើប្រាស់ថ្នាំញៀនក៏ធ្លាប់បានកម្លាំងជំនាញអធិការរដ្ឋានចាប់បញ្ជូន និងធ្លាប់ជាប់គុកកាលពីប៉ុន្មានឆ្នាំមុន៕
