ត្បូងឃ្មុំ៖បុរសជាមន្ត្រីនគរបាលព្រហ្មទណ្ឌម្នាក់បានបាញ់សម្លាប់ស្ត្រីជាសង្សារម្នាក់ចេញពីក្នុងរថយន្តនៅក្នុងបរិវេណក្លិបខារ៉ាអូខេមួយកន្លែងស្ថិតក្នុងភូមិជីមាន់កណ្តាលឃុំក្រែកស្រុកពញាក្រែកនៅម៉ោងប្រមាណជិត ៨យប់ថ្ងៃទី៩ ខែក្កដា ឆ្នាំ២០២០។
ដោយសារទំនាស់ពាក្យសម្តីក្នុងពេលផឹកស៊ីនៅកន្លែងឃាតកម្មនោះ។ប៉ុន្តែក្រោយពេលធ្វើសកម្មភាពបាញ់សម្លាប់ជនរងគ្រោះរួចហើយជនសង្ស័យបានព្យាយាមបើករថយន្តរត់គេចចេញពីកន្លែងកើតហេតុ។ចៃដន្យក៏ត្រូវបានជួបគ្រោះថ្នាក់ចរាចរណ៍គឺបុកពីខាងក្រោយរថយន្តធុនធំមួយគ្រឿងក្នុងភូមិពោធិស្រុកឃុំកោងកាងបណ្តាលឱ្យរងរបួសធ្ងន់។រថយន្តបានខូចខាតយ៉ាងដំណំបញ្ជួនទៅសង្គ្រោះមន្ទីរពេទ្យក្រុងភ្នំពេញ។
ប្រភពព័ត៌មានពីកន្លែងកើតហេតុបានឱ្យដឹងថា ស្ត្រីរងគ្រោះអាយុ ២០ ឆ្នាំឈ្មោះ ហេង សុហៀម ហៅ ហ៊ីម មានទីលំនៅភូមិ៣៧ ឃុំក្រែកបានរងរបួសធ្ងន់ ដោយអាវុធខ្លីចំនួនមួយគ្រាប់ចំកដៃខាងឆ្វេង ធ្លាយមកគល់ដោះខាងឆ្វេងនិងធ្លាយមកឆ្អឹងខ្នងខាងស្តាំបណ្តាលឱ្យស្លាប់ពេលបញ្ជួនទៅកាន់មន្ទីរពេទ្យ។ ចំណែកជនសង្ស័យឈ្មោះ មូល ទិតឧត្តម អាយុ ៣៤ ឆ្នាំនៅក្រុងកំពង់ចាម។ ជនរងគ្រោះ និងជនសង្ស័យជាសង្សារនឹងគ្នាច្រើនឆ្នាំមកហើយ។
លោកឧត្តមសេនីយ៍ទោបែនរ័ត្នស្នងការនគរបាលខេត្តត្បូងឃ្មុំបានឱ្យដឹងថាករណីនេះខាងលោកនៅមិនដឹងច្បាស់ផ្តើមឡើងដោយសារអ្វីពិតប្រាកដនៅឡើយទេ។គ្រាន់តែដឹងថានៅមុនមានអំពើបាញ់សម្លាប់ស្ត្រីរងគ្រោះជនល្មើសជាមន្ត្រីនគរបាលពាក់ស័ក្តិបីជាប្រធានផ្នែកព្រហ្មទណ្ឌកម្រិតធ្ងន់។
លោកឧត្តមសេនីយទោ បានបន្តថាជនសង្ស័យបានបើកបររថយន្តម៉ាកប្រូសរបស់ខ្លួន ទៅឈ្លោះប្រកែកជាមួយជនរងគ្រោះដល់ក្លិបកន្លែងដែលខាងនាងស្នាក់នៅបណ្តោះអាសន្នហើយក៏បានបាញ់សម្លាប់នារីរងគ្រោះដោយអាវុធខ្លីម៉ាកកា៥៤ផលិតនៅប្រទេសចិន។រួចក៏បានគេចខ្លួនបានបន្តិចក៏ជួបគ្រោះថ្នាក់ចរាចរណ៍របួសធ្ងន់ធ្ងរ កំពុងទទួលការសង្គ្រោះនៅមន្ទីរពេទ្យក្រុងភ្នំពេញ។
លោកបានបន្តថា ជុំវិញករណីនេះខាងលោកកសាងសំណុំរឿង ដើម្បីចាត់ការតាមនីតិវិធី៕
