អន្តរជាតិ៖យោងតាមតួលេខស្តីពីអ្នកឆ្លង និងស្លាប់ដោយវីរុសកូវីដ១៩ ចេញពីគេហទំព័រworldometer នាវេលាម៉ោង១និង៣០នាទីរសៀលថ្ងៃទី៦ខែកក្កដាឆ្នាំ២០២០នេះបានចុះផ្សាយថា៖ចាប់ពីផ្ទុះការឆ្លងរាលដាលនៃវីរុសកូវីដ១៩មករហូតមកដល់ពេលនេះសហរដ្ឋអាមេរិករកឃើញអ្នកឆ្លងសរុប២.៩៧៩.៩១១នាក់។ក្នុងនោះមានអ្នកជំងឺជាង១៣ម៉ឺននាក់បានស្លាប់និងជាង១,២លាននាក់ផ្សេងទៀតបានជាសះស្បើយ។
គួរបញ្ជាក់ផងដែរថានាពេលថ្មីៗនេះ បើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ បានចុះផ្សាយថា រដ្ឋមួយចំនួនក្នុងសហរដ្ឋអាមេរិកកំពុងប្រឈមមុខនឹងការកើនឡើងវិញនៃករណីឆ្លង ដែលសភាពធ្ងន់ធ្ងរជាងមុន។ខណៈមានការព្រួយបារម្ភបន្ថែមពីនេះទៀតថាមន្ទីរពេទ្យជាច្រើនអាចនឹងលែងមាន សមត្ថភាពទទួលព្យាបាលអ្នកជំងឺ។
ប្រធានាធិបតីអាមេរិកលោកដូណាល់ត្រាំបានអះអាងនៅកំឡុងធ្វើសុន្ទរកថាថ្ងៃបុណ្យឯករាជជាតិកាលពីថ្ងៃទី៤ខែកក្កដាថា៩៩ភាគរយនៃករណីឆ្លងកូវីដ១៩នៅក្នុងសហរដ្ឋអាមេរិកលែងមានការគំរាមកំហែងទាំងស្រុង។ប៉ុន្តែក្រុមមន្ត្រីសុខាភិបាលអាមេរិកបានព្រមានថាមន្ទីរពេទ្យអាចនឹងលែងមានសមត្ថភាព ទទួលព្យាបាលអ្នកជំងឺដ៏ច្រើនលើសលប់ បើសិនជាករណីឆ្លងនៅតែបន្តកើនឡើង។
បើតាមសាកលវិទ្យាល័យចនហប់ឃីនស៍(JohnsHopkins)របស់សហរដ្ឋអាមេរិកបានឱ្យដឹងថាក្នុងរយៈពេល៤ថ្ងៃនៃកក្កដានេះ រដ្ឋចំនួន ១៥ បានរាយការណ៍ពីការកើនឡើង នៃករណីឆ្លងយ៉ាងគំហុក ។ជាពិសេសគឺរដ្ឋតិចសាស់តែម្ដងដែលមានករណីឆ្លងថ្មីៗដល់ទៅ៨.២៥៨នាក់ពេញមួយថ្ងៃសៅរ៍ចុងសប្ដាហ៍កន្លងទៅនេះ ស្របពេលចំនួនអ្នកជំងឺបច្ចុប្បន្ន សម្រាកព្យាបាលនៅមន្ទីរពេទ្យបានកើនដល់ ៧.៨៩០នាក់ បើធៀបទៅនឹង២សប្ដាហ៍មុនមានតែ ៣.២៤៧នាក់តែប៉ុណ្ណោះ៕
