ភ្នំពេញ៖ស្នងការដ្ឋាននគរបាលរាជធានីបានបិទស្លាកសញ្ញារាជសីហ៍ដែលជាឡូហ្គោនិមិត្តរូបតំណាងនគរបាលជាតិដល់រថយន្តទាំងឡាយដែលប្រើប្រាស់ស្លាកន.ប។ការបិទស្លាកឡូហ្គោរាជសីហ៍តំណាងនគរបាលជាតិនេះគឺជាការសម្គាល់បញ្ជាក់នូវទ្រព្យសម្បត្តិរបស់រថយន្តប្រើប្រាស់ដោយនគរបាល។ដើម្បីចៀសវាងការក្លែងបន្លំរបស់រថយន្តមួយចំនួនដែលប្រើប្រាស់ស្លាកលេខន.ប បង្កការរិះគន់ពីប្រជាពលរដ្ឋ។
រថយន្តពាក់ស្លាកលេខន-បចំនួន១១៨គ្រឿងដែលបានចុះបញ្ជីជាទ្រព្យរបស់អង្គភាពស្នងការដ្ឋាននគរបាលរាជធានីភ្នំពេញបានប្រមូលយកមកត្រួតពិនិត្យនិងបិទឡូហ្គោរូបសញ្ញានគរបាលជាតិ(រាជសីហ៍)។ពីមន្ត្រីនគរបាលមកពីអគ្គនាយកដ្ឋានភស្តភារនិងហិរញ្ញវត្ថុក្រសួងមហាផ្ទៃនិងវត្តមានលោកឧត្តមសេនីយ៍ឯកសថេតអគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ។
ដើម្បីឱ្យការប្រើប្រាស់រថយន្តស្លាកលេខន-បឱ្យស្របតាមគោលការណ៍ច្បាប់។គ្រាដែលគេមើលឃើញថាក្នុងរយៈពេលចុងក្រោយនេះមានការប្រើប្រាស់រថយន្តពាក់ស្លាកលេខន-បក្លែងក្លាយបំពាក់លើរថយន្តស៊េរីទំនើបៗមួយចំនួនបង្កឱ្យរងការរិះគន់ពីបណ្តាញព័ត៌មានសង្គមដែលធ្វើឱ្យប៉ះពាល់កិត្តិយសនគរបាលជាតិ។
ពាក់ព័ន្ធនិងការប្រើប្រាស់រថយន្តពាក់ស្លាកលេខន-បស្នងការដ្ឋាននគរបាលរាជធានីភ្នំពេញនៅក្នុងកិច្ចប្រជុំបូកសរុបលទ្ធផលប្រតិបត្តិការការងារសន្តិសុខសណ្តាប់ធ្នាប់សង្គមប្រចាំខែមិថុនាលើកទិសដៅការងារប្រចាំខែកក្កដា។
កាលពីព្រឹកថ្ងៃទី២៣ខែមិថុនាឆ្នាំ២០២០ក៏បានណែនាំមន្ត្រីនគរបាលចំណុះអង្គភាពទាំងអស់ដែលមានរថយន្តប្រើប្រាស់ពាក់ស្លាកន-បមិនត្រឹមត្រូវតាមច្បាប់ត្រូវដោះចេញជាបន្ទាន់។បើក្នុងករណីត្រូវបានសមត្ថកិច្ចចាប់ឃាត់អាចប្រឈមរងការចោទប្រកាន់ពីបទល្មើសក្លែងឯកសារសាធារណៈខុសច្បាប់។
ក្នុងកិច្ចប្រជុំនោះផងដែរលោកឧត្តមសេនីយ៍ឯកសថេតក៏បានណែនាំឱ្យមន្ត្រីនគរបាលចំណុះស្នងការដ្ឋាននគរបាលរាជធានីភ្នំពេញត្រូវប្រើប្រាស់មធ្យោបាយរបស់រដ្ឋឱ្យចំទិសដៅការងារនិងហាមមិនឱ្យយកមធ្យោបាយទាំងនោះប្រើប្រាស់ធ្វើជាកម្មសិទ្ធបុគ្គលរឺជាលក្ខណៈគ្រួសារប្រើខុសទិសដៅការងាររបស់រដ្ឋដែលបង្ករងការរិះគន់ពីមជ្ឈដ្ឋានប្រជាពលរដ្ឋ។
លោកឧត្តមសេនីយ៍ឯកសថេតបានលើកឡើងនិងដាក់ទិសដៅការងារមួយចំនួនសម្រាប់កម្លាំងនគរបាលក្រោមឱវាទយកទៅអនុវត្តការងារបន្តនៅខែកក្កដាខាងមុខនេះ។ដោយបានណែនាំផែនការងារសន្តិសុខបន្តតាមដានស្រាវជ្រាវចាប់ឃាត់មុខសញ្ញាដែលធ្វើសកម្មភាពខុសច្បាប់បង្កអំពើញុះញង់នាំទៅរកចលាចលក្នុងសង្គមយកមកអនុវត្តតាមផ្លូវច្បាប់។
ណែនាំឱ្យផែនការងារព្រហ្មទណ្ឌនិងអធិការដ្ឋាននគរបាលខណ្ឌទាំង១៤បន្តអនុវត្តវិធានការណ៍បង្ការទប់ស្កាត់និងបង្ក្រាបបទល្មើសអំពើលួចឆក់ប្លន់ធានាបានសុខសុវត្ថិភាពជូនប្រជាបលរដ្ឋបញ្ហានេះត្រូវរួមគ្នាដោះស្រាយដោយប្រើប្រាស់វិធានការសរុបកម្លាំងសរុប។ណែនាំផែនការងារចរាចរណ៍ឱ្យបន្តអនុវត្តរឹតបន្តឹងច្បាប់ចរាចរណ៍ផ្លូវគោកឱ្យបានម៉ឺងម៉ាត់។មន្ត្រីអនុវត្តច្បាប់ត្រូវអនុវត្តឱ្យបានត្រឹមត្រូវចៀសវាងអនុវត្តលើសគោលការណ៍និងបទបញ្ជាថ្នាក់លើ។
លោកស្នងការក៏បានជម្រុញផែនការការងារប្រឆាំងគ្រឿងញៀនបន្តចាត់វិធានការប្រយុទ្ធប្រឆាំងគ្រឿងញៀនឱ្យមានប្រសិទ្ធភាពបំផុតនិងស្រាវជ្រាវស្វែងរកបង្ក្រាបមុខសញ្ញាលក់ចែកចាយជួញដូរគ្រឿងញៀនដើម្បីដោះស្រាយបញ្ហាគ្រឿងញៀន។ណែនាំឱ្យមន្ត្រីនគរបាលក្រោមឱវាទបន្តយកចិត្តទុកដាក់ខ្ពស់បំផុតពីសុវត្ថិភាពថ្នាក់ដឹកនាំកំពូលនៃព្រះរាជណាចក្រកម្ពុជា ក៏ដូចជាប្រតិភូជាតិនិងអន្តរជាតិ ។
ត្រូវសហការនិងអង្គភាពដទៃការពារថែរក្សាសន្តិសុខសណ្តាប់ធ្នាប់ឱ្យបានល្អដោយធ្វើយ៉ាងណាធានាឱ្យបានសុវត្ថិភាពគ្រប់គ្រាន់ជូនដល់ថ្នាក់ដឹកនាំនិងប្រតិភូជាតិ-អន្តរជាតិ។ការងារនេះត្រូវអនុវត្តមានការទទួលខុសត្រូវខ្ពស់៕
