ខេត្តព្រះវិហារ៖កសិករស្រុកគូលែនខេត្តព្រះវិហារកំពុងនាំគ្នាប្រមូលផលដំណាំដំឡូងមីយ៉ាងមមាញឹកនិងសប្បាយរីករាយបំផុតខណៈតម្លៃទីផ្សារមានតម្លៃខ្ពស់សមរម្យរីឯទិន្នផលក៏មានភាពល្អប្រសើរបើធៀបនិងឆ្នាំកន្លងទៅ។
ដំណាំដំឡូងមីត្រូវបានគេដាំនៅស្ទើរគ្រប់ខេត្តក្នុងប្រទេសកម្ពុជា ដោយជាធម្មតាគេចាប់ផ្តើមដាំក្នុងខែឧសភា និងប្រមូលផលចាប់ពីខែវិច្ឆិការហូតដល់ចុងខែកុម្ភៈក្នុងឆ្នាំនីមួយៗ។ដោយឡែកសម្រាប់ខេត្តព្រះវិហារដែលជាខេត្តមានសក្ដានុពលមួយនៃកម្ពុជានារដូវប្រមូលផលដំណាំដំឡូងមីឆ្នាំនេះកំពុងមានភាពល្អប្រសើរបើធៀបនិងរយៈពេលដូចគ្នាកាលពីឆ្នាំមុន។
លោក ឌៀប ចម ប្រធានក្រុមប្រឹក្សាភិបាលសហគមន៍កសិកម្មលើកកម្ពស់កសិករ នៅឃុំគូលែនជើង ស្រុកគូលែនខេត្តព្រះវិហារបាននិយាយថា៖បច្ចុប្បន្ននេះកសិករសហគមន៍របស់លោកបាននិងកំពុងមមាញឹកខ្លាំងក្នុងការប្រមូលផលដំឡូងមីសិរីរាង្គជាបណ្ដើរៗហើយ។គឺសម្រាប់ធ្វើការផ្គត់ផ្គង់លក់ជូនក្រុមហ៊ុនក្នុងស្រុកមួយតាមរយៈការធ្វើកសិកម្មតាមកិច្ចសន្យា លើបរិមាណជាង ៧៥៤៨ហិកតា។
លោកបានបន្តថា៖កសិករសហគមន៍មានភាពសប្បាយរីករាយខ្លាំងមែនទែនខណៈដែលទិន្នផលឆ្នាំនេះក៏មានភាពល្អប្រសើរហើយតម្លៃដែលបានចចារជាមួយក្រុមហ៊ុនទទួលទិញគឺមានតម្លៃ៣៦០រៀលក្នុងមួយគីឡូក្រាមសម្រាប់ដំឡូងស្រស់។តម្លៃនេះខ្ពស់សមរម្យបើធៀបជាមួយនិងតម្លៃខាងក្រៅគឺខុសគ្នាពី៣០ទៅ៤០រៀលក្នុងមួយគីឡូក្រាម។
លោក ពឹង ទ្រីដាប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ បានឱ្យដឹងថា ក្នុងឆ្នាំ២០២០នេះផ្ទៃដីដាំដុះដំណាំដំឡូងមីនៅទូទាំងខេត្តព្រះវិហារ មានចំនួនជាង ២៥.០០០ហិកតា ។ក្នុងនោះមានសហគមន៍កសិកម្មចំនួន១១បានចុះកិច្ចសន្យាផលិតនិងផ្គត់ផ្គង់ដំឡូងមីសរីរាង្គស្រស់លក់ឱ្យក្រុមហ៊ុនសាជីវកម្មសហគមន៍កសិកម្មកម្ពុជា ហៅថា CACC លើបរិមាណសរុបជាង ៤ម៉ឺនតោន។
ជាមួយនេះលោកថាបច្ចុប្បន្ននេះកសិករនៅទូទាំងខេត្តចាប់ផ្ដើមមមាញឹកខ្លាំងក្នុងការប្រមូលផលដំណាំដំឡូងមីបណ្ដើរៗហើយ។ក្នុងនោះការប្រមូលផលរបស់ពួកគាត់មានភាពល្អប្រសើរបើធៀបនិងឆ្នាំមុនដែលអាចទទួលផលប្រមាណជាជិត៥០តោនក្នុងមួយហិកតា។ទន្ទឹមគ្នានេះដែរប្រធានមន្ទីរកសិកម្មក៏បានធ្វើការផ្ដាំផ្ញើឱ្យកសិករទាំងអស់ចុះឈ្មោះចូលជាសមាជិកសហគមន៍ដើម្បីងាយស្រួលក្នុងការលក់ផលិតផលកសិកម្មដូចជាស្រូវដំឡូងនិងចន្ទីរជាដើម។
ដែលក្នុងនោះកសិករមិនត្រឹមតែទទួលបាននូវនិរន្ដរភាពទីផ្សារមានតម្លៃខ្ពស់ជាងទីផ្សារខាងក្រៅនិងមិនមានកាត់ភាគរយទម្ងន់ ដោយក្នុង១តោន ក្រុមហ៊ុនគិតលុយជូន ១.០០០គីឡូពេញបើធៀបជាមួយកសិករខាងក្រៅ គេកាត់ចាប់ពី១០ទៅ២០ភាគរយ។បន្ថែមពីនេះទៀតកសិករថែមទាំងអាចទទួលបាននូវការបណ្ដុះបណ្ដាលពីក្រុមហ៊ុនលើជំនាញទុនផ្សេងៗ និងការអនុវត្តជាក់ស្តែង ទាក់ទងទៅនឹងស្តង់ដាសិរីរាង្គប្រព័ន្ធសវនកម្មផ្ទៃក្នុង បច្ចេកទេសដាំដុះ ការធ្វើផែនការទិញលក់ សហគ្រិនភាព គោលគំនិតអាជីវកម្ម ការកត់ត្រាហិរញ្ញវត្ថុ និងការគ្រប់គ្រងជាដើម៕សហការី
