ប៉ៃលិន៖លោកហ៊ុនម៉ានីប្រធានសហភាពសហព័ន្ធយុវជនកម្ពុជាបានបញ្ជូនសម្ភារការពារជំងឺកូវីដ-១៩ឱ្យទៅភ្នាក់ងារខេត្តប៉ៃលិនចុះចែកជូនដល់ប្រជាពលរដ្ឋក្នុងសហគមន៍។
លោកស្រីបាន ស្រីមុំ ប្រធានសហភាពសហព័ន្ធយុវជនកម្ពុជាខេត្តប៉ៃលិននៅក្នុងពិធីទទួលកាលពីថ្ងៃទី ៤ខែធ្នូឆ្នាំ២០២០បានលើកឡើងថា៖អំណោយសម្ភារជាច្រើនដែលក្រុមការងារខេត្តប៉ៃលិនទទួលបាននៅពេលនេះរួមមាន:អាល់កុល,ម៉ាស់,សាប៊ូ,ជេលសម្អាតដៃ,ផ្ទាំងប៉ាណូ,ប័ណ្ណផ្សព្វផ្សាយ,រួមទាំងថវិកាមួយចំនួនទៀត។សម្ភារទាំងអស់នេះជាចំណែកមួយក្នុងការការពារទប់ស្កាត់ការរីករាលដាលវីរុសកូវីដ-១៩ ក្នុងដំណាក់កាលឆ្លងចូលដល់តំបន់សហគមន៍។
ប្រធានស.ស.យ.ក.ខេត្តប៉ៃលិនបន្តថា៖ចំពោះមុខនិងជាបន្ទាន់ក្រុមការងារនឹងរៀបចំបែងចែកសម្ភារទាំងអស់នេះបន្តជូនដល់ភ្នាក់ងារយុវជនក្នុងឃុំសង្កាត់ទាំង៨។សំដៅពង្រឹងការងារទប់ស្កាត់នូវជំងឺកូវីដ-១៩ឱ្យបានទាន់ពេលវេលា។ក្រៅពីនេះជម្រុញដល់ភ្នាក់ងារឱ្យពន្លឿនចុះផ្សព្វផ្សាយណែនាំអប់រំឱ្យបានគ្រប់ទិសទីស្តីពីវិធានការការពារជំងឺផ្លូវដង្ហើមថ្មីអនុវត្តតាមការណែនាំរបស់ក្រសួងសុខាភិបាលដល់ប្រជាពលរដ្ឋនៅតាមមូលដ្ឋាន និងតាមខ្នងផ្ទះនីមួយៗ៕សហការី
