កំពង់ចាម:លោកអ៊ុនចាន់ដាអភិបាលខេត្តកំពង់ចាមបានថ្លែងថាៈ”ក្នុងយុគសម័យទំនើបនេះគឺគ្មានមន្ត្រីនគរបាលណាម្នាក់ដែលអាចបំពេញភារកិច្ចទទួលខុសត្រូវដោយមិនបានឆ្លងកាត់ការបណ្តុះបណ្តាលអប់រំនោះទេ”។
លោកអភិបាលខេត្តកំពង់ចាមបានថ្លែងដូច្នេះនៅក្នុងឱកាសដែលលោកនិងលោកនាយឧត្តមសេនីយ៍សាស្ត្រចារ្យសេងផល្លីប្រធានបណ្ឌិតសភានគរបាលកម្ពុជាបានអញ្ជើញចូលរួមបិទវគ្គបណ្តុះបណ្តាលកម្រិតបឋមវិជ្ជាជីវ: ជំនាន់ទី១៤ លើកទី២ នៅសាលានគរបាលភូមិភាគ២ ខេត្តកំពង់ចាមកាលពីថ្ងៃទី ២៣ ខែវិច្ឆិកា ឆ្នាំ២០២០។
លោកអ៊ុនចាន់ដាបានមានប្រសាសន៍ថាៈរដ្ឋបាលខេត្តកំពង់ចាមសូមគាំទ្រនិងកោតសរសើរដោយស្មោះនូវរាល់សកម្មភាពរបស់បណ្ឌិតសភានគរបាលកម្ពុជាក្នុងការបំពេញភារកិច្ចក្នុងការអប់រំបណ្តុះបណ្តាលមន្ត្រីនគរបាលជាតិឱ្យក្លាយជាធនធានមនុស្សប្រកបដោយគុណភាពនិងសមត្ថភាពវិជ្ជាជីវ:ពេញលេញ។ដើម្បីបំពេញការងារជូនអង្គភាពប្រកបដោយប្រសិទ្ធភាពស្របតាមផែនការអភិវឌ្ឍន៍ធនធានមនុស្សរបស់ក្រសួងមហាផ្ទៃនិងគោលនយោបាយកំណែទម្រង់កងកម្លាំងប្រដាប់អាវុធរបស់រាជរដ្ឋាភិបាល។
លោកបានបន្ថែមថាជាការពិតក្នុងយុគសម័យទំនើបនេះមន្ត្រីនគរបាលមិនអាចបំពេញភារកិច្ចទទួលខុសត្រូវរបស់ខ្លួនដោយគ្មានការឆ្លងកាត់ការអប់រំបណ្តុះបណ្តាលនោះទេ។ដោយសារការអប់រំបណ្តុះបណ្តាលមានតួនាទីសំខាន់ក្នុងការអភិវឌ្ឍសមត្ថភាពនិងធនធានមនុស្សសម្រាប់អភិវឌ្ឍន៍ប្រទេសជាតិលើគ្រប់វិស័យ៕សហការី
