បន្ទាយមានជ័យ៖បុរសម្នាក់បានរអិលជើង ធ្លាក់ពីលើភ្នំចូលក្នុងរណ្តៅមានទឹក ដែលក្រុមហ៊ុនចិនជីកយកថ្ម បណ្តាលឱ្យលង់ស្លាប់។ហេតុការណ៍នេះបានកើតឡើងនៅម្តុំភ្នំខ្លែងពណ៌ ស្ថិតក្នុងភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ កាលពីល្ងាចថ្ងៃទី៥ ខែតុលា។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេកបានឱ្យដឹងថា បុរសបាត់បង់ជីវិតឈ្មោះ ថៃ ណារិទ្ធ អាយុ៣០ឆ្នាំនៅភូមិបឹងស្នោ ឃុំស្លក្រាម ស្រុកស្វាយចេក ខេត្តបន្ទាយមានជ័យ។លោកអធិការបានបន្តថា មុនកើតហេតុ ជនរងគ្រោះបានឡើងទៅបាញ់សត្វព្រាបលើភ្នំត្រង់ភ្នំខ្លែងពណ៌។
ពេលនោះស្រាប់តែរអិលជើងរមៀលធ្លាក់ពីលើភ្នំ ចូលក្នុងរណ្តៅថ្មមានទឹកលិចបាត់តែម្តង។ក្រោយកើតហេតុ អ្នកភូមិនៅជិតទីនោះបានឃើញ ក៏នាំគ្នាជួយចុះរាវរកក្នុងទឹកជាច្រើនម៉ោងទើបរកឃើញ តែអកុសលជនរងគ្រោះបានស្លាប់បាត់ទៅហើយ។បន្ទាប់មកមន្ត្រីអាជ្ញាធរបានប្រគល់សពឱ្យក្រុមគ្រួសារយកទៅធ្វើបុណ្យ៕
