ភ្នំពេញ៖បុរសម្នាក់បើករថយន្តក្នុងល្បឿនលឿន ជ្រុលទៅបុករថយន្តដឹកខ្សាច់ពីក្រោយពេញទំហឹង បណ្តាលឱ្យរងរបួសធ្ងន់។ចំណែករថយន្តខូចខ្ទេចមួយកំណាត់មុខ។
គ្រោះថ្នាក់ចរាចរណ៍នេះបានកើតឡើងនៅតាមផ្លូវជាតិលេខ៦អារ សង្កាត់ព្រែកលៀប ខណ្ឌជ្រោយចង្វា កាលពីវេលាទៀបភ្លឺថ្ងៃទី១៧ ខែកុម្ភៈ។ សាក្សីបានឱ្យដឹងថា មុនកើតហេតុមានរថយន្តម៉ាក HILLUXVIGO ផ្លាកលេខភ្នំពេញ 2AH-0203 បើកតាមផ្លូវជាតិលេខ៦អារ ពីលិចទៅកើតក្នុងល្បឿនយ៉ាងលឿន។
មកដល់កន្លែងខាងលើបានជ្រុលទៅបុករថយន្តបែនដឹកខ្សាច់ចំពីក្រោយពេញទំហឹងបណ្តាលឱ្យរថយន្ត HILLUX VIGO ខូចខ្ទេចផ្នែកខាងមុខទាំងស្រុង។ចំណែកអ្នកបើកបររងរបួសធ្ងន់ត្រូវបានគេជួយដឹកទៅមន្ទីរពេទ្យសង្រ្គោះបន្ទាន់។រីឯរថយន្តដឹកខ្សាច់បន្ថែមល្បឿនទៅមុខបាត់។
ក្រោយកើតហេតុនគរបាលចរាចរណ៍ចុះមកយករថយន្តទៅរក្សាទុកនៅអធិការដ្ឋាននគរបាលខណ្ឌជ្រោយចង្វាដើម្បីដោះស្រាយពេលក្រោយ៕
