បាត់ដំបង៖កម្លាំងនគរបាលព្រហ្មទណ្ឌកម្រិតធ្ងន់ខេត្តបាត់ដំបងសហការជាមួយកម្លាំងនគរបាលប៉ុស្តិ៍ស្នឹង ស្រុកបាណន់កាលពីរសៀលថ្ងៃទី២៥ខែកញ្ញាឆ្នាំ២០២០ បានតាមចាប់ខ្លួនជនសង្ស័យ ជាមេខ្លោងចោរប្លន់ នៅរាជធានីភ្នំពេញ ហើយរត់មកលាក់ខ្លួន នៅភូមិស្នឹងកើត ឃុំស្នឹង ស្រុកបាណន់ ខេត្តបាត់ដំបង។ ក្រោយចាប់ខ្លួនបាន សមត្ថកិច្ច ក៏បានបញ្ជូនទៅកាន់រាជធានីភ្នំពេញ។
មន្ត្រីនគរបាលព្រហ្មទណ្ឌកំរិតធ្ងន់ បានឱ្យដឹងថាៈ ជនសង្ស័យប្លន់ប្រដាប់អាវុធ ឈ្មោះ ណយ សុផាន់ ហៅ ប៉ាន់ អាយុ ២១ ឆ្នាំ រស់នៅភូមិក្រាញ់ តាបាញ់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។ មន្ត្រីជំនាញ ដកហូតបានម៉ូតូ មួយគ្រឿង ម៉ាកហុងដា ឌ្រីម ស៊េរីឆ្នាំ ២០២០ ពណ៌ខ្មៅ ពាក់ស្លាក លេខ ភ្នំពេញ1IB-7320 ។
មន្ត្រីដដែល បានបន្តថា ជននេះ ត្រូវបានចាប់ខ្លួន តាមរយៈក្មេងប្រុសម្នាក់ ដែលជននេះ ប្រើឱ្យទៅដកលុយជំនួស នៅកន្លែង « វីង » ដែលជននេះ ប្រាប់ឱ្យមិត្តស្រីរបស់ខ្លួន នៅភ្នំពេញ វេរឱ្យចំនួន ១០ ម៉ឺន រៀល ។នៅចំពោះមុខសមត្ថកិច្ច ជនសង្ស័យនេះ បានឆ្លើយសារភាពថាៈ ខ្លួនពិតជាបានធ្វើសកម្មភាពប្លន់ជាមួយនឹងបក្ខពួក។តែជននេះ អះអាងថា ខ្លួនមិនមែនជាមេខ្លោង ក្រុមប្លន់ប្រដាប់អាវុធទេ ។
មន្ត្រីនាយកដ្ឋានព្រហ្មទណ្ឌ បានប្រាប់ថាៈ ឈ្មោះ ណយ សុផាន់ ហៅ ប៉ាន់ នេះ រួមជាមួយគូកន ប៉ុន្មាននាក់ទៀត ដែលបានចាប់ខ្លួន ក្រោយពេលកើត ហេតុ គឺពួកគេ បានធ្វើសកម្មភាព ស្ទាក់ប្លន់យកម៉ូតូអ្នកដំណើរ នៅក្នុងរាជធានីភ្នំពេញ និងនៅតាមបណ្ដាខេត្ត មួយចំនួនទៀត មិនតិចជាង ១០ លើកឡើយ ៕