ឆេះផ្ទះចំនួន ០៦ ខ្នង មានទ្រព្យសម្បត្តិអស់គ្មានសល់ក្នុងខណ្ឌឫស្សីកែវ។

ភ្នំពេញ៖អគ្គិភ័យបានឆាបឆេះផ្ទះចំនួន៦ខ្នងផ្ទះនិងសម្ភារប្រើប្រាស់-ទ្រព្យសម្បត្តិអស់គ្មានសល់តែមិនបណ្ដាលឱ្យមនុស្សរងគ្រោះថ្នាក់ទេ។
គ្រោះអគ្គិភ័យនេះ បានកើតឡើងស្ថិតនៅជិតផ្លូវជាតិលេខ៥ ក្នុងភូមិឡរកំបោរ សង្កាត់ស្វាយប៉ាក ខណ្ឌឬស្សីកែវ កាលពីម៉ោង៦ព្រឹកថ្ងៃទី១៦ ខែវិច្ឆិកា។ពលរដ្ឋបានឱ្យដឹងថា មុនកើតហេតុមានផ្សែងហុយចេញពីផ្ទះធ្វើត្រីមួយកន្លែង សាងសង់អំពីឈើលើថ្មក្រោម។មួយសន្ទុះក្រោយមកស្រាប់តែឃើញអណ្តាតភ្លើងបានឆាបឆេះឡើងយ៉ាងសន្ធោសន្ធៅ រហូតឆេះរាលដាលដល់ផ្ទះអ្នកជិតខាងជាបន្តបន្ទាប់ ។
ភ្លាមៗនោះកម្លាំងរថយន្តពន្លត់អគ្គិភ័យបានចេញមកអន្តរាគមន៍ជាច្រើនគ្រឿងហើយបាញ់ទឹកពន្លត់ប្រើរយៈពេល២ម៉ោងក្រោយទើបភ្លើងបានរលត់ទៅវិញ។មន្ត្រីនគរបាលបង្ការពន្លត់អគ្គិភ័យនិងសង្គ្រោះបានឱ្យដឹងថា មូលហេតុភ្លើងឆាបឆេះនេះបណ្តាលមកពីឆ្លងចរន្តអគ្គិសនីបង្កឱ្យផ្ទះចំនួន៦ខ្នងផ្ទះ ខូចខាតទាំងស្រុង និងសម្ភារប្រើប្រាស់ទ្រព្យសម្បត្តិឆេះអស់គ្មានសល់។
ក្នុងហេតុការណ៍នោះសមត្ថកិច្ចមិនទាន់ដឹងពីទំហំនៃការខូចខាតនៅឡើយទេដោយមន្ត្រីអាជ្ញាធរកំពុងសាកសួរម្ចាស់ផ្ទះ៕