ខេត្តស្វាយរៀង៖មានការផ្ទុះអាវុធពីមន្ត្រីប៉េអឹមម្នាក់ដែលផឹកស្រាស្រវឹងឡូឡាទាស់សម្តីគ្នានិងបានដកកាំភ្លើងខ្លីបាញ់ប្រឡោះជើងបុរសម្នាក់ទៀតចំនួន២គ្រាប់ហើយវាយជនរងគ្រោះ២ស្នាប់កាំភ្លើងត្រូវចំក្បាលបណ្តាលឱ្យបែកហូរឈាមស្រោចខ្លួន។ករណីនេះបង្កការភ្ញាក់ផ្អើលនៅភូមិតាប៉ោងឃុំសង្កែស្រុករំដួលខេត្តស្វាយរៀងកាលពីវេលាម៉ោង១០យប់នៅថ្ងៃទី១៦ខែកញ្ញាឆ្នាំ២០២០កន្លងមក។
ជនរងគ្រោះឈ្មោះទាចាន់ណាភេទប្រុសអាយុ៣៨ឆ្នាំរស់នៅភូមិប៉ប្រកសង្កាត់កាកាបខណ្ឌពោធិសែនជ័យរាជធានីភ្នំពេញ។ចំណែកជនបង្កឈ្មោះប៉េងឡាដាភេទប្រុសអាយុ ៤៧ឆ្នាំជាមន្ត្រីប៉េអឹម។
ប្រភពពីសមត្ថកិច្ចបានឱ្យដឹងថាមុនពេល កើតហេតុមានបុរសចំនួន៥នាក់បាននាគ្នា ផឹកស៊ីរួមមាន៖ ១,ឈ្មោះហែមសុវណ្ណភេទប្រុសអាយុ៥៤ឆ្នាំជាម្ចាស់ផ្ទះ។២,ឈ្មោះមាចវិបុលភេទប្រុសអាយុ២៩ឆ្នាំត្រូវជាកូនប្រសារម្ចាស់ផ្ទះ។៣,ឈ្មោះញឹមវ៉ាន់ឌីភេទប្រុសអាយុ ២៤ឆ្នាំរស់នៅភូមិត្រពាំងផ្ទឺមឃុំត្រពាំង ម្កាក់ស្រុកអង់ស្នួលខេត្តកណ្តាល។៤,ជនរងគ្រោះនិង៥,មិនស្គាល់ឈ្មោះ។
ប្រភពបានបន្តថាជនសង្ស័យក៏បានផ្ទុះ អាវុធចំនួន២គ្រាប់និងទៅវាយលើជនរងគ្រោះចំនួន២
ដៃចំក្បាលរួចក៏ទាញយកអាវុធខ្លីពីចង្កេះបាញ់ប្រឡោះជើងជនរងគ្រោះចំនួន៣គ្រាប់។រួចវាយចំនួន២ស្នាប់ កាំភ្លើងត្រូវចំក្បាល ពីក្រោយទៀត បណ្តាលឱ្យបែកក្បាល ហូរ ឈាម ស្រោច ដងខ្លួន ក្រោយពីមានទំនាស់ពាក្យសម្តីក្នុងវង់ផឹកស៊ី។បន្ទាប់ពីផ្ទុះអាវុធនិងវាយជនរងគ្រោះរួចមកជនបង្កបានឡើងជិះម៉ូតូគេចខ្លួនបាត់ភ្លាមៗ។ដោយឡែកជនរងគ្រោះត្រូវបានក្រុមគ្រួសារនាំទៅកាន់គ្លីនិកឯកជនដើម្បីលាងរបួសហើយនាំមកសម្រាកនៅផ្ទះវិញ។
លោកសែវុទ្ធីមេបញ្ជាការកងរាជអាវុធហត្ថខេត្តស្វាយរៀងបានឱ្យដឹងនៅព្រឹកថ្ងៃទី១៨ខែកញ្ញាឆ្នាំ២០២០ថាៈពិតជាមានករណីនេះកើតឡើងមែន។លោកបានបន្តថាៈជនរងគ្រោះបានរងរបួសបន្តិចបន្តួចត្រូវបានក្រុមគ្រួសារយកទៅមន្ទីរពេទ្យរុំរបួសហើយយកមកផ្ទះវិញ។ក្នុងនោះមិនមានការប្តឹងទេទើបខាងកងរាជអាវុធហត្ថខេត្តមិនមានចំណាត់ការព្រោះពួកគេសុទ្ធតែបងប្អូននឹងគ្នា។ប៉ុន្តែលោកមេបញ្ជាការកងរាជអាវុធហត្ថខេត្តមិនបានបញ្ជាក់ពីដាក់វិន័យកងកម្លាំងក្នុងការផ្ទុះអាវុធអនាធិបតេយ្យនោះទេ៕
