ស្ទឹងត្រែង/នៅថ្ងៃទី១២ខែមិថុនាឆ្នាំ២០២០នេះអាវុធហត្ថបានបញ្ជូនអ្នកបើកបររថយន្តដឹកឈើម្នាក់ទៅតុលាការក្រោយរកឃើញសារធាតុញៀន។រីឯឈើត្រូវបានបញ្ជូនទៅកាន់ជំនាញរដ្ឋបាលព្រៃឈើខេត្តស្ទឹងត្រែង។
សូមបញ្ជាក់ថាកាលពីវេលាម៉ោងជាង១រំលងអាធ្រាត្រឈានចូលថ្ងៃទី១១ខែមិថុនាឆ្នាំ២០២០កម្លាំងកងរាជអាវុធហត្ថបានឃាត់រថយន្តសាំយ៉ុងដឹកផលអនុផលព្រៃឈើមួយគ្រឿងនៅចំណុចជិតអូរពងមាន់ស្ថិតភូមិរាជានុកូលសង្កាត់ក្រុងស្ទឹងត្រែងនាំយកទៅកាន់ទីបញ្ជារដ្ឋានកងរាជអាវុធហត្ថខេត្ត។
រថយន្តសាំយ៉ុងខាងលើនោះពាក់ស្លាកលេខភ្នំពេញ២E៣៣៥៨ ពណ៍សបានដឹកឈើប្រភេទទ្វារ។
មន្ត្រីខណ្ឌរដ្ឋបាលព្រៃឈើខេត្តស្ទឹងត្រែងបានបញ្ជាក់នៅថ្ងៃទី១២ខែមិថុនាថាលោកបានទទួលវត្ថុតាងបទល្មើសនោះហើយ។តាមការពិនិត្យឃើញថាផលអនុផលអនុផលព្រៃឈើដែលលោកបានទទួលជាប្រភេទឈើសុក្រំ(ទ្វារ)មានចំនួន៤មែត្រគូប២៣៣។
ប្រភពពីសមត្ថកិច្ចបានឱ្យដឹងថាអ្នកបើកបររថយន្តឈ្មោះសុខផាន់ណាភេទប្រុសអាយុ៤១ឆ្នាំរស់នៅភូមិព្រែកសង្កាត់ស្ទឹងត្រែងក្រុងស្ទឹងត្រែងគឺជាមេឈ្មួញជើងខ្លាំងខាងលួចដឹកជញ្ជូនឈើចេញពីដែនដីស្រុកថាឡាបរិវ៉ាត់ជាយូរណាស់មកហើយ។មន្ត្រីជំនាញរដ្ឋបាលព្រៃឈើស្រុកមិនបង្ក្រាបបាននោះឡើយ។ទើបតែអាវុធហត្ថខេត្តបង្ក្រាបបាននៅក្រុងស្ទឹងត្រែងក្រោយពីរថយន្តឆ្លងកាត់ស្ពានមេគង្គក្នុងគោលបំណងឆ្ពោះទៅកាន់ខេត្តក្រចេះ។
បន្ទាប់ពីបង្ក្រាបអាវុធហត្ថខេត្តស្ទឹងត្រែងបានបញ្ជូនវត្ថុតាងបទល្មើសទៅរក្សាទុកក្នុងខណ្ឌរដ្ឋបាលព្រៃឈើដើម្បីកសាងសំណុំរឿងចាត់ការតាមនិតិវិធីច្បាប់។ចំពោះអ្នកបើកបររថយន្តដែលមាសារធាតុញៀនត្រូវកម្លាំងអាវុធហត្ថខេត្តស្ទឹងត្រែងបញ្ជូនទៅតុលាការនៅថ្ងៃទី១២ខែមិថុនាឆ្នាំ២០២០នេះ៕
