ម៉ូតូជិះប៉ះគ្នាដួល ត្រូវរថយន្តមកពីក្រោយ កិនស្លាប់ម្នាក់ របួសធ្ងន់៣នាក់

ភ្នំពេញ៖ម៉ូតូនិងម៉ូតូជិះប៉ះគ្នាក៏ដួលត្រូវរថយន្តធុនធំបើកមកពីក្រោយកិនបណ្តាលឱ្យស្ត្រីម្នាក់ស្លាប់មួយរំពេចនិង៣នាក់ទៀតរងរបួសធ្ងន់រីឯម៉ូតូខូចខាតយ៉ាងដំណំ។
ហេតុការណ៍នេះបានកើតឡើងនៅម្តុំច្រកចូលទីលានចាក់សំរាមចាស់ស្ទឹងមានជ័យតាមផ្លូវលេខ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យកាលពីព្រឹកថ្ងៃទី៣ ខែសីហា។
សមត្ថកិច្ចបានឱ្យដឹងថា ស្ត្រីបាត់បង់ជីវិតឈ្មោះពុំ សារឹម អាយុ៤២ឆ្នាំធ្វើការរោងចក្រស្នាក់នៅមុខមន្ទីរពេទ្យមិត្តភាពខ្មែរ-សូវៀតនិងស្ត្រីរួមដំណើររងរបួសធ្ងន់។ជនរងគ្រោះជិះម៉ូតូម៉ាកវីវ៉ាផ្លាកលេខ ភ្នំពេញ1L-6998 ។រីឯម៉ូតូមួយទៀតម៉ាកហុងដាឃ្លីកផ្លាកលេខភ្នំពេញ1HM-2915 ជិះដោយបុរស២នាក់ឌុបគ្នាបានរងរបួសធ្ងន់តែគេមិនទាន់ស្គាល់អត្តសញ្ញាណនៅឡើយ។រថយន្តធំម៉ាកហ៊ីយ៉ាន់ដាយផ្លាកលេខព្រះសីហនុ 3A-3805។ ក្រោយពីកិនមនុស្សឱ្យស្លាប់និងរបួសរួច តៃកុងរថយន្តបង្កបានចុះរត់គេចខ្លួនបាត់៕