កណ្តាល៖ នៅថ្ងៃទី២៩ ខែសីហា ឆ្នាំ២០២០ នេះ ក្រុមអ្នកញៀនល្បែងអាប៉ោង៥នាក់ដែលនគរបាលស្រុកស្អាងដេញប្រផាប់ចាប់ប្រភីង ទម្រាំចាប់ខ្លួនបាន ត្រូវលោកស្រី ស៊ុន យ៊ឺត ព្រះរាជអាជ្ញារងអមសាលាដំបូង ខេត្តកណ្តាលដោះលែងឱ្យមាន សេរីភាពវិញ។
ជុំវិញការដោះលែងនេះ អ្នកសារព័ត៌មាន បានទំនាក់ទំនងទៅលោក ទិន សុចិត្រា អ្នកនាំពាក្យអយ្យការ អមសាលាដំបូង ខេត្តកណ្តាល ដើម្បីសុំការបំភ្លឺ ជាច្រើនលើក តែទូរស័ព្ទគ្មានអ្នកទទួល ។
គួររំលឹកថា កាលពីថ្ងៃទី២៧ ខែសីហា ឆ្នាំ២០២០ វេលាម៉ោង ១១និង៣០នាទី នៅចំណុចខាងក្រោយផ្ទះ ង៉ោ រ៉េត ស្ថិតក្នុងភូមិព្រែកស្លែង ឃុំតាលន់ ស្រុកស្អាង ខេត្តកណ្ដាល នគរបាលស្រុកស្អាង បានបង្ក្រាបករណី លេងល្បែងស៊ីសង អាប៉ោងមួយករណី ។ សមត្ថកិច្ច បានអះអាងថាៈ ជនសង្ស័យទី១ ឈ្មោះ ចុះ ថា អាយុ៥៥ឆ្នាំ, ទី២.ឈ្មោះ ឃឹម លី អាយុ៤២ឆ្នាំ, ទី៣.ឈ្មោះ ផេង ភាន់ អាយុ៥៣ឆ្នាំ, ទី៤.ឈ្មោះ តុ ខ្លឹម អាយុ៥៥ឆ្នាំ និងទី៥.ឈ្មោះ អូក បឿន អាយុ៥៥ឆ្នាំ ។
សមត្ថកិច្ចបានឱ្យថា មានប្រជាពលរដ្ឋ បានរាយការណ៍មកសមត្ថកិច្ច ថាមានគេលេងល្បែងស៊ីសង ។ ក្រោយពីទទួលបាន ព័ត៌មាននេះភ្លាម កម្លាំងនគរបាលប៉ុស្ដិ៍តាលន់ សហការជាមួយ កម្លាំងនគរបាលប៉ុស្ដិ៍ត្រើយស្លា និងកម្លាំងប្រជាការពារ បានចុះដល់កន្លែងកើតហេតុ បានឃាត់ខ្លួនជនសង្ស័យទាំងអស់ រួមនឹងវត្ថុតាងមួយចំនួន តែម្តង ៕
