បន្ទាយមានជ័យ៖ ក្រោយពីផឹកស៊ីនៅខ្ទមស្រែ ក៏ស្រវឹង ហើយទាស់សម្តីគ្នា បង្កវាយនឹងចបកាប់ ជម្រះស្មៅម្នាក់ស្លាប់។ ឯម្នាក់ទៀត បានត្រូវសមត្ថកិច្ចចាប់ខ្លួន និងបានកសាងសំណុំរឿង ហើយបញ្ជូនទៅតុលាការដាក់គុក បណ្តោះអាសន្ន ។ អំពើហិង្សានោះ បានកើតឡើង នៅត្រង់ចំណុចអូរកងរ៉ក់ ចម្ងាយ ៤ គ.ម ពីភូមិថ្មី ឃុំស្វាយចេក ស្រុកស្វាយចេក ខេត្តបន្ទាយមានជ័យកាលពីថ្ងៃទី២៨ ខែសីហា ឆ្នាំ២០២០។
មន្ត្រីនគរបាល ស្រុកស្វាយចេក បានឱ្យដឹងថាៈ ជនរងគ្រោះ ដែលស្លាប់នោះ មានឈ្មោះ ឈី ភេទប្រុស អាយុ៥១ឆ្នាំ មានលំនៅ នៅភូមិសូរិយា សង្កាត់និមិត្ត ក្រុងប៉ោយប៉ែតខេត្តបន្ទាយមានជ័យ។ ចំណែកជនសង្ស័យ ឈ្មោះ ភី ចម ភេទប្រុស អាយុ៤៨ឆ្នាំ រស់នៅភូមិ ឃុំ ជាមួយគ្នា ។
មុនពេលកើតហេតុ ជនសង្ស័យ និងជនរងគ្រោះ ទាំងពីរនាក់ ជាអ្នកស៊ីឈ្នួល ដេកចាំចម្ការដំឡូងមី នៅចំណុចកើតហេតុឱ្យឈ្មោះ សុខ ចាន់វុទ្ធ ភេទប្រុស អាយុ ៣៩ ឆ្នាំនៅភូមិឃុំ ជាមួយគ្នា ហើយទៅទិញដីចម្ការ នៅស្រុកស្វាយចេក ។ នៅពេលសម្រាក ពួកគេ បានហូបបាយ និងផឹកស្រាថ្នាំ ជាមួយគ្នា នៅនឹងខ្ទមចម្ការ ។ ដល់ពេលស្រវឹងរៀងៗខ្លួន ក៏មានទាស់ពាក្យសម្តី ឈានដល់កើតមានអំពើហិង្សា គឺជនសង្ស័យ បានយកចបកាប់ជំរះស្មៅ វាយទៅលើជនរងគ្រោះ ត្រូវក្បាលជាច្រើនកន្លែង បណ្តាលឱ្យដេកស្លាប់ នៅក្នុងថ្លុកឈាម។
លុះព្រឹកឡើង មានប្រជាពលរដ្ឋ ទៅចម្ការក្បែរនោះ បានប្រទះឃើញសព ក៏រាយការណ៍ ហើយតមក សមត្ថកិច្ច បានចុះទៅពិនិត្យ និងឈានដល់ ការតាមចាប់បាន ជនដៃដល់ ៕