ព្រះវិហារ៖កាលពីថ្ងៃទី២៦ ខែសីហា ឆ្នាំ២០២០លោក ហោ ប៊ុនហួរ អភិបាល ស្រុករវៀង បានដឹកនាំក្រុមការងារចុះផ្សព្វផ្សាយច្បាប់ភូមិបាល,ច្បាប់រដ្ឋបាលព្រៃឈើ ,ពាក់ព័ន្ធនឹងវិវាទដីធ្លីរវាងក្រុមហ៊ុន គឹមជាធួន ជាមួយប្រជាពលរដ្ឋចំនួន ១៥៧គ្រួសារ នៅក្នុងភូមិអូរទ្រលោក ឃុំរមទម ស្រុករវៀង ខេត្តព្រះវិហារ។
លោក ស៊ុ ស៊ីវុត្ថា នាយផ្នែករដ្ឋបាលព្រៃឈើរវៀង បានឱ្យដឹងថាៈក្រុមហ៊ុន គឹម ជាធួន បានវិនិយោគដីសម្បទានសេដ្ឋកិច្ចពីរាជរដ្ឋាភិបាលកម្ពុជានៅឆ្នាំ២០១១ លើផ្ទៃដីចំនួន ៨.៨៤៦ហិកតា ។នៅឆ្នាំ២០១៤ ត្រូវបានក្រុមការងារឃ្វាលចេញនូវដីប៉ះពាល់ចំនួន ៩១៤គ្រួសារ ស្មើនឹង២.២៣០,៨១ហិកតា ដោយក្រុមហ៊ុននៅសល់ផ្ទៃដីសរុបចំនួន ៦.៦១៥,១៩ហិកតា។
ក្រោយពីបានស្តាប់នូវការផ្សព្វផ្សាយច្បាប់ភូមិបាល និងច្បាប់រដ្ឋបាលព្រៃឈើរួចមក បងប្អូនប្រជាពលរដ្ឋ ក៏មានសំណួរសួរទៅខាងក្រុមការងារ។ ភ្លាមៗនោះជំនាញពាក់ព័ន្ធបានធ្វើការបកស្រាយ និងបញ្ជាក់យ៉ាងច្បាស់ជូនដល់បងប្អូនប្រជាពលរដ្ឋទៅតាមសំណួរនីមួយៗ។
លោក ហោ ប៊ុនហួរ អភិបាលស្រុករវៀង បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ លោកប្រាក់ សុវណ្ណ អភិបាលខេត្តព្រះវិហារ និងលោកឡុង សុវណ្ណ ប្រធានក្រុមប្រឹក្សាខេត្តព្រះវិហារ ដែលលោកតែងតែគិតគូរអំពីសុខទុក្ខ និងជីវភាពរស់នៅរបស់ប្រជាពលរដ្ឋជានិច្ច។
លោកអភិបាលស្រុក បានសំណូមពរដល់ប្រជាពលរដ្ឋដែលមានជម្លោះដីធ្លីជាមួយក្រុមហ៊ុនគឹមជាធួនសូមកុំជឿតាមការញុះញុង បំផុសបំផុលពីសំណាក់មេខ្យល់ពីក្រោយខ្នង និងសូមឱ្យប្រជាពលរដ្ឋកុំបន្តការកាប់រាន ទន្ទ្រានយកដីរដ្ឋដើម្បីធ្វើជាកម្មសិទ្ធផ្ទាល់ខ្លួន។
លោកអភិបាលស្រុករវៀង បានបញ្ជាក់បន្ថែមថា សំណើរបស់បងប្អូនប្រជាពលរដ្ឋដែលបានលើកឡើងនៅពេលនេះ លោកនឹងធ្វើរបាយការណ៍ជូនទៅអភិបាលខេត្តព្រះវិហារដើម្បីពិនិត្យ និងសម្រេចជាបន្តទៀត។លោក ហោ ប៊ុនហួរ ក៏បានអំពាវនាវដល់ប្រជាពលរដ្ឋ ត្រូវខិតខំយកចិត្តទុកដាក់ថែរក្សាសុខភាព ប្រកាន់ខ្ជាប់នូវអនាម័យល្អ (ហូបស្អាត ផឹកស្អាត និងរស់នៅស្អាត)ដើម្បីជៀសវាងពីជំងឺនានា ជាពិសេសត្រូវរួមគ្នាទប់ស្កាត់ជម្ងឺឆ្លងកូវីដ១៩។
គោរពច្បាប់ចរាចរណ៍ផ្លូវគោកទាំងអស់គ្នា កាត់បន្ថយការគ្រោះថ្នាក់ដល់អាយុជីវិតរបស់បងប្អូន។ ត្រូវចៀសឱ្យឆ្ងាយពីគ្រឿងញៀន ព្រោះគ្រឿងញៀនបានបំផ្លាញខ្លួនឯង ក្រុមគ្រួសារ និងសង្គមជាតិ៕
