ភ្នំពេញ៖រថយន្តម៉ាកតូយ៉ូតាហាយឡេនឌ័របានបើកយ៉ាងលឿនបត់ឆ្លងផ្លូវជ្រុលទៅបុកម៉ូតូពេញទំហឹងរួចកិនពីលើបណ្តាលឱ្យប្តីនិងប្រពន្ធរងរបួសធ្ងន់។
សាក្សីបានឱ្យដឹងថា គ្រោះថ្នាក់ចរាចរណ៍នេះបានកើតឡើងនៅមហាវិថីព្រះនរោត្តមក្នុងសង្កាត់ផ្សារថ្មីទី៣ ខណ្ឌដូនពេញកាលពីយប់ថ្ងៃទី៩ ខែមេសាឆ្នាំ២០២២។មុនកើតហេតុមានប្តីប្រពន្ធជិះម៉ូតូម៉ាកហុងដាឌ្រីមផ្លាកលេខ កំពង់ស្ពឺ 1E-5567 ឌុបគ្នាតាមមហាវិថីព្រះនរោត្តមពីជើងទៅត្បូង។
មកដល់ផ្លូវបំបែកជាបួនស្រាប់តែមានរថយន្តតូយ៉ូតាហាយឡេនឌ័រផ្លាកលេខ សៀមរាប 2B-8775 បើកតាមហាវិថីព្រះនរោត្តមពីជើងទៅត្បូងយ៉ាងលឿន។រថយន្តនេះបានបត់ឆ្លងចូលផ្លូវក៏ជ្រុលចង្កូតទៅបុកម៉ូតូពេញទំហឹងបណ្តាលឱ្យដួលរួចកិនពីលើបណ្តាលឱ្យប្តីប្រពន្ធរងរបួសធ្ងន់ត្រូវបានគេជួយដឹកយកទៅសង្រ្គោះបន្ទាន់។ក្រោយកើតហេតុអ្នកបើកបរបានចុះរត់គេចខ្លួនបាត់។បន្ទាប់មកសមត្ថកិច្ចបានចុះមកយករថយន្តនិងម៉ូតូទៅរក្សាទុកនៅអធិការដ្ឋាននគរបាល ខណ្ឌដូនពេញ រង់ចាំដោះស្រាយនៅពេលក្រោយ៕
