កំពង់ចាម៖អភិបាលខេត្តកំពង់ចាមលោកអ៊ុនចាន់ដាបានដឹកនាំមន្ត្រីរាជការចុះត្រួតពិនិត្យការដ្ឋានសាងសង់សំណង់ខឿនការពារច្រាំងទន្លេមេគង្គស្ថិតនៅខាងក្រោយសាលាសង្កាត់កំពង់ចាមនិងមួយកន្លែងជាខឿនការពារច្រាំងទន្លេតូចស្ថិតក្នុងឃុំពង្រស្រុកកោះសូទិនកាលពីរសៀលថ្ងៃទី១៥សីហាឆ្នាំ២០២០។
លោកផ្លោកសុវណ្ណចៅសង្កាត់កំពង់ចាមបានប្រាប់កាសែតរស្មីកម្ពុជានៅថ្ងៃទី១៦សីហាថាៈគិតត្រឹមថ្ងៃទី១៥សីហាដែលលោកអ៊ុនចាន់ដាអភិបាលខេត្តកំពង់ចាមបានដឹកនាំមន្ត្រីចុះត្រួតពិនិត្យសំណង់ការដ្ឋានច្រាំងខឿនការពារច្រាំងទន្លេមេគង្គប្រវែងជាង៦០ម៉ែត្រ។គឺខាងក្រុមហ៊ុនឯកជនអនុវត្តការងារបានប្រមាណ ៧៥ ភាគរយហើយ។
លោកចៅសង្កាត់បានបន្តថាសំណង់ការពារច្រាំងទន្លេនេះគឺសល់ការងារប្រហែលជាង២០ភាគរយទៀតនោះគឺជាការងារនៅខាងលើច្រាំង។ដូច្នេះករណីប្រសិនបើទឹកជំនន់ទន្លេមេគង្គហក់ឡើងនៅចន្លោះខាងក្រុមជាងឈប់សម្រាកជំនួសក្នុងឱកាសបុណ្យចូលឆ្នាំប៉ុន្មានថ្ងៃនេះក៏មិនប៉ះពាល់ដល់ដំណើរការស្ថាបនាការងារនៅសល់នោះដែរ។
ចំណែកសំណង់ការពារច្រាំងទន្លេតូចស្ថិតក្នុងឃុំពង្រស្រុកកោះសូទិនត្រូវបានលោកយិនវណ្ណ:ជាអភិបាលស្រុកប្រាប់ថាៈខឿនសម្រាប់ការពារច្រាំងទន្លេតូចបច្ចុប្បន្នបានស្ថាបនាស្ទើរ៩០ភាគរយហើយ។គឺនៅសល់ការងារជាសំណង់បង្គោលសម្រាប់លម្អផ្នែកខាងលើច្រាំងប៉ុណ្ណោះ។ម្លោះហើយខាងក្រុមជាងបានឈប់សម្រាកតាំងពីថ្ងៃទី១៥ខែសីហាឆ្នាំ២០២០។ម្យ៉ាងទៀតទន្លេមេគង្គក៏បាននិងកំពុងបន្តស្រកចុះ៕
