សៀមរាប៖សមត្ថកិច្ចបានឃាត់ខ្លួនជនបរទេសចំនួន៥៣នាក់រយៈពេល៧ខែដើមឆ្នាំ២០២០នេះដែលស្នាក់នៅនិងធ្វើការខុសច្បាប់ក្នុងខេត្តសៀមរាប។លោកឧត្តមសេនីយ៍ត្រីជាគឹមសានស្នងការរងទទួលផែនការងារអន្តោប្រវេសន៍នៃស្នងការដ្ឋាននគរបាលខេត្តសៀមរាប បានឱ្យដឹងកាលពីថ្ងៃទី៧ខែសីហា ឆ្នាំ២០២០ថា៖ក្នុងរយៈពេល៧ខែដើមឆ្នាំ២០២០នគរបាលអន្តោប្រវេសន៍បានចុះបង្ក្រាបជនបរទេសដែលចូលមកស្នាក់នៅនិងធ្វើការមិនស្របច្បាប់ក្នុងខេត្តសៀមរាបចំនួន២២លើក។
លោកបានបន្តថាសមត្ថកិច្ចបានឃាត់ខ្លួនចំនួន៥៣នាក់ស្រីចំនួន១០នាក់។ក្នុងនោះមាន១២សញ្ជាតិ ហើយជនបរទេសទាំងអស់នោះត្រូវបានសមត្ថកិច្ចជំនាញកំពុងរៀបចំកសាងសំណុំរឿងនិងសុំគោលការណ៍ត្រៀមបណ្តេញចេញរួចរាល់ហើយដែរ ។លោកបានបន្តថា ជនបរទេសដែលចូលមកស្នាក់នៅនិងធ្វើការក្នុងប្រទេសកម្ពុជាស្របច្បាប់ ត្រូវបានបែងចែកជា២ប្រភេទគឺ៖
ទី១.ជនបរទេសអន្តោប្រវេសន៍គឺជាជនបរទេសដែលស្នាក់នៅរយៈពេលយូររបៀបជាការតាំងទីលំនៅជាក្រុមគ្រួសារ។ទី២.ជនបរទេសមិនមែនអន្តោប្រវេសន៍គឺជាជនបរទេសដែលចូលមកស្នាក់នៅបណ្តោះអាសន្នរយៈពេលខ្លីហើយជនបរទេសដែលស្របច្បាប់ទាំងអស់ត្រូវបំពេញតាមលក្ខន្តិកៈច្បាប់អន្តោប្រវេសន៍នៃព្រះរាជាណាចក្រកម្ពុជា ។
សូមបញ្ជាក់ថាយោងតាមមាត្រា១៨នៃច្បាប់អន្តោប្រវេសន៍ចែងថាម្ចាស់ឬអ្នកកាន់កាប់លំនៅស្ថានគ្រប់ប្រភេទត្រូវជូនដំណឹងក្នុងរយៈពេល២៤ម៉ោងដល់ស្ថាប័ននគរបាលមានសមត្ថកិច្ចពីវត្តមានជនបរទេសដែលបានមកស្នាក់នៅកម្ពុជា។ចំពោះមាត្រា៣១ចែងថាត្រូវផ្ដន្ទាទោសពិន័យអន្តរការណ៍ជាប្រាក់ពី ១០.០០០ រៀល ដល់ ៣០.០០០ រៀល។
ចំពោះជនណាដែលបានប្រព្រឹត្តល្មើសនឹងមាត្រា ១៨ នៃច្បាប់នេះ។ ក្នុងករណីមិនរាងចាលជនល្មើសត្រូវផ្ដន្ទាទោសពិន័យអន្តរការណ៍ជាប្រាក់ពី ៣០.០០០ រៀលដល់ ៦០.០០០ រៀល ៕
