បាត់ដំបង៖អភិបាលខេត្តបាត់ដំបងលោកងួន រតនៈពេលថ្មីៗនេះ បានក្រើនរំលឹក និងណែនាំ ដល់អាជ្ញាធរក្រុង សង្កាត់ ពិសេសមន្ទីរទេសចរណ៍ខេត្ត និងសមត្ថកិច្ចពាក់ព័ន្ធ ត្រូវចុះធ្វើត្រួតពិនិត្យឱ្យបានច្បាស់លាស់ ពីការលួចបើកសេវា ខារ៉ាអូខេ ដោយជ្រកក្រោមស្លាក ភោជនីយដ្ឋាន។ដែលទង្វើបែបនេះ ផ្ទុយទាំងស្រុង ទៅនឹងការណែនាំ របស់រាជរដ្ឋាភិបាល ក៏ដូចជា ក្រសួងសុខាភិបាល ហើយត្រូវមានវិធានការ ទប់ស្កាត់ឱ្យបានទាន់ពេលវេលា និងត្រូវព្រមាន ចំពោះម្ចាដ់ហាង បើមិនព្រមគោរពតាម ត្រូវបិទទីតាំងចោល មិនឱ្យធ្វើអាជីវកម្ម តទៅទៀត។
ទន្ទឺមនឹងនេះ លោកអភិបាលខេត្ត បានលើកឡើងថា ទាំងអាជ្ញាធរក្រុង និងមន្ត្រីនៃមន្ទីរទេសចរណ៍ ត្រូវបន្តចុះទៅមើលដល់ ទីតាំងភោជនីយដ្ឋាន អាហារដ្ឋាន និងទីកន្លែង ដែលបម្រើសេវាផ្សេងៗ ដើម្បីផ្សព្វផ្សាយ ពីការបង្ការ ទប់ស្កាត់ជំងឺកូវីដ ១៩ ដោយតម្រូវឱ្យម្ចាស់ទីតាំងទាំងនោះ មានរៀបចំបុគ្គលិក ពិនិត្យវាស់កម្តៅ ដល់អតិថិជន ជាភ្ញៀវរបស់ខ្លួន និងត្រូវដាក់អាល់កុល ជែល នៅខាងមុខភោជនីយដ្ឋាន ដើម្បីឱ្យភ្ញៀវលាងដៃ ៕