កំពង់ស្ពឺ៖អភិបាលស្រុកបសេដ្ឋបានចុះទៅចែកកូនកង្កែបដែលជាសត្វធន់និងអាកាសធាតុទៅដល់ប្រជាសហគមន៍ប្រមាណជា៤៨គ្រួសារដើម្បីបង្កើនចំណេះដឹងក្នុងការចិញ្ចឹមនិងសម្រួលជីវភាពប្រចាំថ្ងៃ។សហគមន៍ស្ថិតនៅក្នុងភូមិអូរចាឃុំពោធិម្រាល ស្រុកបសេដ្ឋខេត្តកំពង់ស្ពឺ កាលពីព្រឹកថ្ងៃទី៣ ខែមិថុនា ឆ្នាំ២០២០។
លោកឈឺនសុធនអភិបាលស្រុកបសេដ្ឋបានមានប្រសាសន៍ក្នុងពិធីចែកពូជនិងកូនកង្កែបនេះថាមន្ទីរកសិកម្មរុក្ខាប្រមាញ់និងនេសាទស្រុកបសេដ្ឋសហការជាមួយនឹងអង្គការអភិវឌ្ឍន៍និងការពារបរិស្ថានePDO។គឺធ្វើឡើងចំពេលដែលប្រជាពលរដ្ឋចំណាកស្រុកវិលចូលភូមិកំណើតរបស់ខ្លួនមានកំណើនច្រើនជាងគេតាមបណ្ដាក្រុងស្រុកដទៃទៀតក្នុងខេត្តកំពង់ស្ពឺក្នុងអំឡុងពេលមានផ្ទុះជំងឺរលាកផ្លូវដង្ហើមថ្មី Covid-19 ដែលពិភពលោកកំពុងមានការព្រួយបារម្ភ។
លោកបានបន្តការចែករំលែកនូវបទពិសោធន៍ក៏ដូចជាការចែកជូននូវពូជព្រមទាំងកូនកង្កែបទៅដល់ប្រជាសហគមន៍នៅក្នុងស្រុកបសេដ្ឋ។ជាការគិតគូរយ៉ាងច្បាស់លាស់ដល់សុខទុក្ខនិងជីវភាពប្រជាសហគមន៍ឱ្យចេះដាំដំណាំនិងចិញ្ចឹមសត្វធន់ទៅនឹងការបម្រែបម្រួលអាកាសធាតុដើម្បីឱ្យប្រជាពលរដ្ឋមានការងារធ្វើផងនិងបង្កើនប្រាក់ចំណូលជីវភាពរស់នៅរបស់ប្រជាសហគមន៍ឱ្យកាន់តែប្រសើរឡើង៕
