ព្រះវិហារ៖ភ្លៀងនិងខ្យល់កន្ត្រាក់មួយមេបណ្តាលឱ្យដើមឈើធំៗបានដួលរលំកាត់ផ្លូវជាតិជាច្រើនកន្លែងនិងធ្វើឱ្យផ្លូវជាច្រើនខ្សែក្នុងក្រុងព្រះវិហារបានរងនូវការជន់លិច។ករណីនេះបានកើតឡើងស្ថិតនៅក្នុងក្រុងព្រះវិហារខេត្តព្រះវិហារកាលពីយប់ថ្ងៃទី២០កក្កដាឆ្នាំ២០២០។
លោកសំលាងទ្រីបានថ្លែងឱ្យដឹងនៅថ្ងៃទី២១នេះថា៖ដើមឈើជាច្រើនដើមបានបាក់រលំសង្កត់លើផ្លូវជាតិលេខ៦២ចំនួន៤កន្លែងនិងផ្លូវជាច្រើនខ្សែនៅក្នុងក្រុងព្រះវិហារបានរងការជន់លិច។បញ្ហានេះអាចមកពីមានប្រជាពលរដ្ឋមួយចំនួនយកសំបកបេរឬក្ដារបន្ទះមកបិទរុន្ធលូទើបបណ្តាលឱ្យមានការកកស្ទះទឹកបែបនេះ។
លោកបានបន្តថាបន្ទាប់ពីបានដឹងភ្លាមលោកបានចាត់មន្ត្រីជំនាញរបស់មន្ទីរសាធារណការនិងដឹកជញ្ជូនខេត្តចុះសហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ប៉ាលហាលចុះកាត់ដើមឈើដែលដួលរលំកាត់លើផ្លូវជាតិ លេខ ៦២ចំនួន៤កន្លែង អូសចេញពីលើទ្រូងផ្លូវ និងដើរប្រមូលសំរាម សំបកបេ ក៏ដូចជាបន្ទះក្តារយកចេញពីមាត់រុន្ធលូជាច្រើនកន្លែង។ដើម្បីបញ្ជៀសការកកស្ទះទឹកធ្វើឱ្យចរន្តទឹកហូរធម្មតាវិញនិងជួយសម្រួលដល់ការធ្វើដំណើររបស់បងប្អូនប្រជាពលរដ្ឋប្រកបដោយសុវត្ថិភាព។
លោក សំ លាងទ្រី បានអំពាវនាវដល់ប្រជាពលរដ្ឋទាំងអស់ សូមបញ្ឈប់នូវការចោលសំរាមផ្តេស ផ្តាសតទៅទៀត ដែលធ្វើឱ្យកកស្ទះដល់លូបង្ហូរទឹក ហើយងាកមករួមសហការគ្នា ធ្វើអនាម័យ សម្អាតនិងថែរក្សាបរិស្ថានឱ្យបានជាប្រចាំ។ដើម្បីសុខភាពខ្លួនអ្នកដទៃនិងជួយលើកសម្រស់សោភ័ណ្ឌភាពទីក្រុងឱ្យកាន់តែមានការទាក់ទាញមានអ្នកទេសចរណ៍ចូលមកទស្សនាកាន់តែច្រើន ៕
