បាត់ដំបង៖អាជ្ញាធរខេត្តបាត់ដំបងបានជ្រើសយកទីតាំងចំនួន៣នៅជាប់តំបន់ព្រំដែនដើម្បីធ្វើចត្តាឡីស័កពលករខ្មែរដែលវិលក្នុងដំណាក់កាលផ្ទុះជំងឺកូវីដ-១៩នៅប្រទេសថៃ។ក្រោយពីលោក សឿម ប៊ុនរិទ្ធអភិបាលរងខេត្តបាត់ដំបងចុះពិនិត្យរៀបចំដើម្បីអនុវត្តធ្វើចត្តាឡីស័ក។ក្នុងនោះមានទីតាំងចំនួន២ស្ថិតនៅក្នុងស្រុកកំរៀង និងមួយទីតាំងទៀតស្ថិតនៅក្នុងស្រុកសំពៅលូន។
ទីតាំងដែលមានលក្ខណៈអំណោយផលទី១នៅក្នុងបរិវេណវិទ្យាល័យកំរៀងមានចំនួន៤២បន្ទប់ ដោយក្នុងមួយបន្ទប់ៗអាចឱ្យពលករសម្រាកបានចំនួន១០នាក់,ទីតាំងទី២គឺស្ថិតនៅក្នុងមណ្ឌលសុខភាពត្រាងមានគ្រែសម្រាកចំនួន២០គ្រែក្នុងស្រុកកំរៀង។ដោយឡែកទីកន្លែងទី៣នៅក្នុងបរិវេណសាលាបឋមសិក្សាជ្រៃសីមាឃុំជ្រៃសីមាស្រុកសំពៅលូនមានចំនួន១០បន្ទប់ដោយមួយបន្ទប់ៗរៀបចំឱ្យពលករសម្រាកធ្វើចត្តាឡីស័កបានចំនួន១០នាក់។ដើម្បីការរពារការឆ្លងរីករាលដាលចូលក្នុងសហគមន៍ ដោយតម្រូវឱ្យអនុវត្តយ៉ាងហ្មត់ចត់តាមការណែនាំរបស់សម្តេចតេជោ ហ៊ុន សែន នាយករដ្ឋមន្ត្រី និង វិធានការរបស់ក្រសួងសុខាភិបាល។
តាមការបញ្ជាក់ពីមន្ទីរសុខាភិបាលខេត្តបាត់ដំបងបានបង្ហាញឱ្យដឹងថា៖ចាប់តាំងពីអនុវត្តន៍វិធានការការពារខាងលើក្រុមការងារជំនាញកាលពីថ្ងៃទី ២០ ខែធ្នូ ឆ្នាំ២០២០បានបញ្ជូននិងប្រគល់ពលករចំនួន ១៤នាក់ឱ្យអាជ្ញាធរមូលដ្ឋានដើម្បីធ្វើចត្តាឡីស័កនៅតាមខ្នងផ្ទះរៀងៗខ្លួន។គិតត្រឹមម៉ោង១២:០០នាទីថ្ងៃត្រង់ថ្ងៃទី២១ខែធ្នូបានបញ្ជូនពលករខ្មែរចំនួន១៧នាក់បន្ថែមទៀតទៅធ្វើចត្តាឡីស័កនៅទីតាំងដែលរដ្ឋបាលខេត្តបានត្រៀមទុក។
ការរៀបចំទទួលពលករខ្មែរហើយអនុវត្តន៍តាមវិធានការក្រសួងសុខាភិបាលនេះធ្វើឡើងបន្ទាប់ពីមានករណីផ្ទុះឡើងនូវជំងឺកូវីដ-១៩ជាច្រើនក្នុងមួយថ្ងៃៗនៅខេត្តសាមុតសាខន ប្រទេសថៃ៕សហការី