ភ្នំពេញ៖បន្ទាប់ពីមានរូបរូបភាពមួយ ត្រូវបានចែកចាយនៅលើ បណ្តាញសង្គមហ្វេសប៊ុក បង្ហាញពីអ្នកអនុវត្តច្បាប់ចរាចរណ៍ តែបានប្រព្រឹត្តខុសច្បាប់ចរាចរណ៍ ចំនួន២ករណីត្រូវប្រធានអង្គភាព ហៅមកផាកពិន័យ ចំនួន១៤ម៉ឺនរៀល។
សមត្ថកិច្ចរាជធានីភ្នំពេញបានឱ្យដឹងថា មន្ត្រីនគរបាលចរាចរណ៍ម្នាក់ដែលបើកម៉ូតូ ល្មើសច្បាប់ចរាចរណ៍ផ្លូវគោក អត់ពាក់មួកសុវត្ថិភាព និងនិយាយទូរសព្ទត្រូវបានប្រធានអង្គភាព ហៅមកផាកពិន័យតាមច្បាប់ បន្ទាប់ពីឃើញរូបភាពគេចែកចាយ នៅលើសង្គមហ្វេសប៊ុល។
ប្រភពដដែលបានឱ្យដឹងទៀតថា កាលពីថ្ងៃទី១៩ ខែមករាបន្ទាប់ពីបានឃើញមានការផុសតាមហ្វេសប៊ុកបង្ហាញពីមន្ត្រីនគរបាលចរាចរណ៍ម្នាក់ បើកបរម៉ូតូលើផ្លូវសាធារណៈ ក្នុងខណ្ឌពោធិ៍សែនជ័យ មិនពាក់មួកសុវត្ថិភាព និងនិយាយទូរសព្ទ។ ភ្លាមៗនោះ លោកឧត្តមសេនីយ៍ឯក ជួនណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យខាងនគរបាលចរាចរណ៍ផ្លូវគោក ស្រាវជ្រាវរកមន្ត្រីបើកបរល្មើសនោះ ដើម្បីឱ្យចូលមកផាកពិន័យតាមច្បាប់ ។
លោកអនុសេនីយ៍ឯក ព្រាប តារា មន្ត្រីនគរបាលចរាចរណ៍នៅថ្ងៃដដែល បានចូលមកអង្គភាពនគរបាលចរាចរណ៍ផ្លូវគោក ដើម្បីផាកពិន័យតាមច្បាប់។ទី១-មិនពាក់មួកសុវត្ថិភាព ចំនួន៦០.០០០រៀល និងទី២-ប្រើប្រាស់ទូរសព្ទពេលបើកបរចំនួន៨០.០០០រៀល សរុបចំនួន១៤០.០០០រៀល។ការអនុវត្តបែបនេះគឺជាគំរូមួយ សម្រាប់អ្នកក្រោយៗទៀត កុំយកតម្រាប់តាមទាំងប្រជាពលរដ្ឋ និងមន្ត្រីរាជការ៕